Bakı metrosunda 20 Yanvar şəhidlərinin əziz xatirəsi anılıb
Bakı, 20 yanvar, AZƏRTAC
Qanlı 20 Yanvar faciəsinin 34-cü ildönümü ilə əlaqədar şəhidlərin xatirəsi “Bakı Metropoliteni” QSC-də bir dəqiqlik sükutla anılıb.
AZƏRTAC xəbər verir ki, saat 12:00-da xətlərdə bütün qatarlar tunellərdən stansiyalara çıxarılıb və sərnişinlərə sükut dəqiqəsini stansiyaların işçi və polis heyəti ilə birgə qeyd etməsi üçün şərait yaradılıb. Qatarlardan bir dəqiqə ərzində fit verilib.
“Bakı Metropoliteni” QSC-nin rəhbərliyi və kollektivin nümayəndələri anım dəqiqəsini “20 Yanvar” stansiyasının platformasında sərnişinlərlə keçiriblər. Sükut dəqiqəsi başa çatdıqdan sonra Azərbaycan Respublikasının Himni səsləndirilib.
Mərasimdən sonra “Bakı Metropoliteni” QSC-nin sədr müavini Hidayət Məmmədov açıqlama verərək, o gecəni Azərbaycanın müasir tarixinin dönüş nöqtəsi kimi qiymətləndirib.
“Bu gün Zəfər tarixinin qüruru içində olan, suverenliyi və konstitusiya quruluşu tam bərpa olunmuş Azərbaycanda 34 il əvvəl baş vermiş o qanlı gecə anılır. Əlbəttə, müstəqilliyini haqq edən bir dövlətin vətəndaşlarıyıq. Həm də ona görə qürurluyuq ki, günahsız qurbanlarımızın, vətən uğrunda canını fəda edən şəhidlərimizin qanı yerdə qalmayıb. Biz çiçəklənən bir ölkənin sakinlərinə çevrilmək üçün çox böyük yol qət etmişik. Bu yolu birlikdə keçmişik, o tarixi əziz tutan və onu qoruyan nəsillər yetişdirmişik. O gecə Bakı metropoliteninin rəhbərliyi bu nəqliyyatın tarixində bəlkə də ən vacib və ən şərəfli qərarını məhz o gecə verdi. Metro sabaha qədər insanların xidmətində dayandı, qapılar bağlanmadı, qatarların hərəkəti dayandırılmadı. Bakı metrosu olmasaydı, söz yox ki, həmin gecə qurbanlarımızın sayı dəfələrlə çox olacaqdı. İnsanlar metropolitenə bir sığınacaq kimi, xilas yeri kimi üz tutmuşdular. Şəhərdə, hətta təcili tibbi yardım maşınlarının atəşə tutulduğu vaxt metropoliten yaralıları qəbul edərək onlara yardım göstərilməsində, xəstəxanalara daşınmasında əhəmiyyətli rol oynadı. İşçilər stansiyalarımıza daxil olan məlumat əsasında yaxın ərazilərdə olan insanların, yaralıların imdadına yetişdi, onların stansiyalara gətirilməsində fədakarlıq göstərdi. Elə o gecədən işçilər bu stansiyanı “20 Yanvar” adlandırmağa başladılar. Çünki artıq biz silahsız, günahsız insanlarımızın həyatına dəyər verməyən bir ordunun adını daşıyan stansiyamızın olmasını istəmirdik. Bir müddət sonra bu ad rəsmi qərarla təsdiqini tapdı. Stansiyanın memarlıq ansamblı 20 Yanvar mövzusunda tamamilə yeniləndi. Bu gün Şəhidlər xiyabanımızda uyuyan günahsız qurbanlar sırasında iki metropolitençi - vaqon təmirçisi İlqar Qarayev və metro inşaatçısı Əflatun Kazımov da var. Onların uca xatirəsi “Nərimanov” elektrik deposunda əbədiləşdirilib. Bu gün bizə bu qürurlu tarixi yaşamağı nəsib etmiş bütün şəhidlərimizin qarşısında baş əyirik və onların xatirəsini əbədi qorumağa, yeni nəsillərə ötürməyə, qəhrəmanlıqları yaşatmağa borcluyuq”, - deyə sədr müavini qeyd edib.
Həmin gün vəzifə borcunu yerinə yetirən “Bakı Metropoliteni” QSC-nin veteran işçiləri - Cahil Həsənov, Vilayət Əsgərov və Məftun Abbasov həmin gecə ilə bağlı xatirələrini bölüşüblər. Bildiriblər ki, 20 Yanvar hadisələrinə aparan yol 1987-ci ildə başlanılmışdı: “O zamandan ermənilər azərbaycanlıları doğma yurd-yuvalarından didərgin salmağa başladılar və həmin yol 1990-cı il yanvarın 20-nə qədər uzandı. O gecə biz maşinistlər səhərədək işlədik. Keçmiş sovet rəhbərliyi həmin gecə fövqəladə vəziyyət elan etmədən qoşunlarını Bakıya yeritdilər. 20 Yanvar gecəsi insanlar güllələrdən yayınmaq üçün sığınacaq yeri kimi Bakı metrosuna üz tuturdular. Həmin gün Azərbaycan xalqı öz azadlığını və suverenliyini bərpa etmək üçün meydanlara çıxmışdı. Bu gün qürur hissi ilə deyə bilərik ki, şəhidlərimizin qanı yerdə qalmadı”.
Qeyd edək ki, sovet qoşunlarının müxtəlif istiqamətlərdən şəhərə soxularaq silahsız insanları amansızlıqla gülləbarana qərq etdiyi o müdhiş gecə metro rəhbərliyin qərarı ilə sübhədək işləyərək atəş yağmurundan xilas olmaq istəyən, sığınacaq axtaranların ümid yerinə çevrilib. Fədakarlıqla yaralanmış insanların xəstəxanalara çatdırılmasında, küçələrdə yardıma ehtiyac duyanların dadına çatmış, bir sözlə, əsl qəhrəmanlıq nümunəsi göstərmiş “Bakı Metropoliteni” QSC kollektivinin faciənin miqyasının dəfələrlə böyük olmasının qarşısının alınmasında əvəzsiz xidmətləri olub.
Bölmənin digər xəbərləri
