BAKI ŞƏHƏR GƏNCLƏR VƏ İDMAN BAŞ İDARƏSİNDƏ GÖRÜŞ KEÇİRİLMİŞDİR
AZƏRTAC xəbər verir ki, oktyabrın 29-da Bakı Şəhər Gənclər və İdman Baş İdarəsinin rəisi Raqif Abbasov (BŞGİBİ) İranın Urmiya Şəhər Bədən Tərbiyəsi və İdman İdarəsinin rəisi Əli Molla Əhmədi ilə görüşmüşdür.
Görüş hər iki qurum arasında idman və mədəniyyət sahələrində əlaqələrin daha da inkişaf etdirilməsi məqsədi ilə 2006-cı ildə imzalanmış niyyət protokolu çərçivəsində keçirilmişdir.
BŞGİBİ-nin rəisi Raqif Abbasov Azərbaycanda uğurla həyata keçirilən gənclər siyasətindən geniş söz açmışdır. Bildirmişdir ki, son illər idmançılarımız beynəlxalq yarışlarda ölkəmizin idman şərəfini layiqincə qorumuş və Vətənə medallarla dönmüşlər. R. Abbasov Azərbaycanda idman sahəsində böyük irəliləyişlərin baş verdiyini, ölkəmizdə bir çox beynəlxalq yarışların yüksək səviyyədə keçirildiyini xüsusi qeyd etmişdir.
Respublikamızın bir çox bölgələrində olimpiya-idman komplekslərinin tikildiyini diqqətə çatdıran natiq, bu istiqamətdə işlərin cari ildə də davam etdirildiyini bildirmişdir.
Raqif Abbasov demişdir ki, protokol imzalandığı gündən ikitərəfli dəvətə əsasən qarşılıqlı nümayəndə heyətlərinin rəsmi görüşləri və müxtəlif idman növləri üzrə 10 səfər baş tutmuşdur.
Əli Molla Əhmədi ölkələrimiz arasında tarixi əlaqələrdən söz açmış və hər iki qurumun dəstəyi ilə keçirilmiş idman yarışlarının böyük əhəmiyyət daşıdığını vurğulamışdır. İranda gənclərin hərtərəfli inkişafı üçün yaradılan şəraitdən söz açan qonaq bildirmişdir ki, ölkələrimizin gəncləri arasında birgə idman yarışlarının, təlim-məşqlərin, turnirlərin keçirilməsi naminə qarşılıqlı səfərlər davam etdirməlidirlər.
Görüşdə BŞGİBİ-nin Xəzəryanı ölkələrin idman oyunlarının keçirilməsi ilə bağlı təklifi müzakirə edilmişdir.
Vurğulanmışdır ki, bu təklifin Xəzəryanı ölkələrin idman qurumlarının rəhbərləri tərəfindən müsbət qarşılanacağı təqdirdə, 2 ildən bir 5 idman növü üzrə yarışlar keçiriləcəkdir.
Sonda görüş iştirakçıları bir-birilərinə qiymətli hədiyyələr təqdim etmişlər.
Bölmənin digər xəbərləri
