BAKI ŞƏHƏR İCRA HAKİMİYYƏTİNİN BAŞÇISI HACIBALA ABUTALIBOVUN ÇIXIŞI
Hörmətli müşavirə iştirakçıları!
İcazə verin, Bakıətrafı qəsəbələrin sosial-iqtisadi inkişafına diqqət və qayğı göstərdiyinə, onların inkişafı ilə əlaqədar Dövlət proqramının hazırlanması barədə tapşırıq verdiyinə görə Azərbaycan Respublikasının Prezidenti möhtərəm cənab İlha m Əliyevə qəsəbələrin sakinləri adından dərin təşəkkürümü və minnətdarlığımı bildirim.
Möhtərəm Prezident!
Bakıətrafı qəsəbələrin qədim və zəngin tarixinə baxmayaraq, bu günə qədər onların geniş və dəqiq inkişaf proqramı olmamışdır. Çox təqdirəlayiqdir ki, Sizin təşəbbüsünüzlə qəbul olunan və hazırda uğurla həyata keçirilən respublika rayonlarının sosial-iqtisadi inkişafına dair Dövlət Proqramına indi Bakının qəsəbələri də qoşulur.
Möhtərəm Prezident, Sizin bu diqqətiniz xalqımızın ümummilli lideri, müdriklikdən müqəddəslik zirvəsinədək yüksəlmiş Heydər Əliyevimizin paytaxtımızın inkişafına göstərdiyi böyük qayğısının davamıdır. Xüsusilə vurğulamaq lazımdır ki, Sizin rəhbərliyiniz altında ötən il noyabrın 3-də Bakı Şəhər İcra Hakimiyyətində keçirilən müşavirədə verdiyiniz göstəriş və tapşırıqlar, imzalayacağınız mühüm əhəmiyyət kəsb edən Dövlət Proqramı Bakının və onun qəsəbələrinin sosial-iqtisadi problemlərinin həllinə çox böyük təkan verəcəkdir.
Məlumat üçün bildirirəm ki, Bakı şəhərində rəsmi statistikaya görə 1 milyon 851 min nəfər daimi qeydiyyatdadır. Bunun 700 min nəfəri şəhərətrafı qəsəbələrdə yaşayır. Hazırda inzibati ərazi bölgüsünə uyğun olaraq, paytaxtda Neft Daşları istisna edilməklə, yığcam yaşayış sahələri də daxil olmaqla 47 qəsəbə nümayəndəliyi mövcuddur. Bu qəsəbələrdə 161 məktəb, 135 uşaq bağçası, 88 poliklinika və xəstəxana fəaliyyət göstərir.
Möhtərəm Prezident!
Sizin 2004-2005-ci illər ərzində bilavasitə göstərişinizlə Bakının qəsəbələrinin qaz, su, elektrik enerjisi, istilik ilə təmin edilməsi, bir sıra qəsəbələrdə yüksək standartlara uyğun yollar çəkilməsi, işıqlandırma sistemlərinin qurulması, sosial obyektlərin tikilməsi və ya əsaslı təmir olunması istiqamətində xeyli işlər görülmüşdür. Bakı qəsəbələrinin sosial-iqtisadi inkişafında, fəaliyyət göstərən uşaq evlərinin, internatların və məktəblərin əsaslı təmirində, lazımi avadanlıqla təmin edilməsində Heydər Əliyev Fondunun, şəxsən onun prezidenti, YUNESKO-nun xoşməramlı səfiri, Milli Məclisin deputatı Mehriban xanım Əliyevanın böyük rolu vardır.
Bununla belə, son illərdə Bakı qəsəbələrinin əhalisi xeyli artdığına, Bakıətrafı yaşayış sahələrində lazımi infrastruktur olmadığına görə sosial problemlər çoxalmışdır. İcazə verin, Bakı qəsəbələrində mövcud olan əsas sosial-iqtisadi problemləri Sizin diqqətinizə çatdırım.
Ən əsas problemlərdən biri qəsəbələrdə əhalinin işlə təmin edilməsidir. Bakı qəsəbələrində işsizlik probleminin həll edilməsi üçün son vaxtlar müəyyən işlər görülsə də, bu problem öz aktuallığını saxlamaqdadır. Qəsəbələrdə işsizlik problemini aradan qaldırmaq üçün yerli sakinlərin tarix boyu məşğulluq ənənələrinə uyğun olaraq, vaxtilə geniş yayılmış təsərrüfatları bərpa etmək, əhalini bu işlərə cəlb etmək vacibdir. Vaxtı ilə Bakının qəsəbələri kənd təsərrüfatı məhsullarının yetişdirilməsi, müxtəlif sənətkarlıq məhsullarının istehsalı ilə məşhur idi.
Məsələn, vaxtı ilə Bilgəh qəsəbəsində zəfəran yetişdirilməsi, Maştağada gülçülük-tərəvəzçilik, Nardaranda xalçaçılıq, gülçülük, balıqçılıq, Zirə və Qalada heyvandarlıq, bostançılıq, Hövsanda tərəvəzçilik məşhur idi. Başqa şəhərətrafı qəsəbələrdə də bunlara bənzər işlər geniş vüsət almışdı. Odur ki, qəsəbələrdə belə təsərrüfatları bərpa edib, əhalini həmin sahələrə cəlb etmək əhəmiyyətli olardı. Eyni zamanda, qəsəbələrdə müxtəlif təyinatlı istehsal sahələri yaratmaq və sahibkarlığın inkişafına əlavə stimullar verməklə işsizlik problemini həll etmək olar.
Bakı qəsəbələrinin ən əsas problemlərindən biri də bu yaşayış məntəqələrinin əksəriyyətində tarix boyu kanalizasiya sisteminin olmamasıdır. Məlumat üçün bildirim ki, bu gün də Bakı qəsəbələrinin əksəriyyətində kanalizasiya sistemi yoxdur. Bəziləri isə kanalizasiya sistemi ilə qismən təmin edilsə də, lazımi texniki səviyyədə deyildir. Qəsəbələrdə kanalizasiya sisteminin olmaması əhalinin yaşayışına, onların qədimdən istifadə etdikləri içməli su quyularına, ətraf mühitə öz mənfi təsirini göstərir və qrunt sularının qalxmasına səbəb olur. Bakı qəsəbələrində müasir kanalizasiya sisteminin yaradılması və əhalinin içməli su ilə təmin edilməsi bu yaşayış məntəqələrinin bir çox problemlərinin həllinə gətirib çıxaracaqdır.
Xüsusilə vurğulamaq istərdim ki, Bakı qəsəbələrinin sosial-iqtisadi inkişafı geoloji, ekoloji və sanitar tələblər nəzərə alınmaqla, onların kommunal, istirahət, istehsal sahələrinin, bütün növ nəqliyyat, mühəndis-kommunikasiya xətləri və qurğularının, idman, səhiyyə, təhsil və digər sosial obyektlərinin yerləşməsini müəyyən edən plan əsasında həll olunmalıdır.
Məlumdur ki, sosial-iqtisadi inkişafda, əhalinin yaşayış səviyyəsinin yüksəlməsində elmin, təhsilin, səhiyyənin, idman və mədəni istirahət ocaqlarının olması çox vacibdir. Sizin qayğınız və köməyiniz nəticəsində şəhərətrafı yaşayış məntəqələrində bu sahədə son vaxtlar müəyyən işlər görülübdür. Bu yaxınlarda Sizin təşəbbüsünüz və iştirakınızla Zabrat qəsəbəsində müasir tələblərə cavab verən yeni təhsil və səhiyyə obyektlərinin özülünün qoyulması bunun daha bir parlaq nümunəsidir.
Ümidvarıq ki, Bakı qəsəbələrinin sosial-iqtisadi inkişafı ilə bağlı imzalayacağınız Dövlət Proqramında qaldırılan bu və digər məsələlər öz əksini tapacaq və bu da şəhərətrafı yaşayış məntəqələrinin sosial-iqtisadi, mədəni inkişafının paytaxt səviyyəsinə çadırılmasında konkret iş proqramı olacaqdır.
Möhtərəm Prezidentimiz!
Sizi əmin edirik ki, Bakı Şəhər İcra Hakimiyyəti imzalayacağınız çox vacib və mühüm əhəmiyyət kəsb edən Bakı qəsəbələrinin sosial-iqtisadi inkişafı ilə bağlı Dövlət Proqramını rəhbər tutaraq, onun yerinə yetirilməsi üçün bütün səylərini və imkanlarını əsirgəməyəcəkdir.
Diqqətinizə görə sağ olun!
Bölmənin digər xəbərləri
