BAKIDA DÜNYA TÜRK GƏNCLƏRİ BİRLİYİNİN VIII LİDERLƏR TOPLANTISI KEÇİRİLƏCƏKDİR
Bakı, 22 may (AZƏRTAC). Bakıda Dünya Türk Gəncləri Birliyinin (DTGB) VIII liderlər toplantısı keçiriləcəkdir.
Gənclər və İdman Nazirliyinin mətbuat xidmətindən bildirmişlər ki, mayın 23-dən 26-dək keçiriləcək toplantıda türk dövlət, muxtar dövlət və topluluqlarında fəaliyyət göstərən gənclər birliklərini təmsil edən gənc liderlər və DTGB ilə daimi əməkdaşlıq edən KİV nümayəndələri iştirak edəcəklər.
Mayın 23-də hökumət nümayəndələri, Milli Məclisin deputatları, gənclər birliklərinin iştirakı ilə toplantının açılış mərasimi olacaqdır.
Türk Dünyası Gənclik günləri və qurultayları arasında keçirilən liderlər toplantısı Dünya Türk Gəncləri Birliyi tərəfindən təşkil olunur. Builki toplantı Gənclər və İdman Nazirliyi və Türk Əməkdaşlıq və İnkişaf Agentliyinin (TİKA) dəstəyi ilə keçirilir.
Toplantının açılış günü iştirakçılar Fəxri xiyabanda ümummilli lider Heydər Əliyevin məzarını, Şəhidlər xiyabanını və türk əsgərlərinin xatirəsinə ucaldılmış abidəni də ziyarət edəcəklər.
Daha sonra nümayəndələr komissiyalar üzrə müzakirələrə başlayacaqlar. Mayın 24-də toplantının yekun sənədləri qəbul ediləcəkdir. Toplantının proqramına əsasən, mayın 25-də nümayəndələrin Milli Məclisdə görüşü olacaqdır.
Qeyd edək ki, DTGB 1992-ci ildə Kazanda əsasən, keçmiş SSRİ ərazisində yaşayan türksoylu xalq və topluluqları təmsil edən gənclər təşkilatlarının nümayəndələrinin iştirak etdikləri qurultayda təsis edilmişdir. Birliyin yaranmasının ilk təşəbbüsçüləri Tatarıstandan “Azadlıq” Gənclər Təşkilatı, Başqırdıstandan Demokratik Gənclər İttifaqı, Balkar Gənclərinin “And” Təşkilatı və Krım-Tatar Məclisinin gənc üzvləri olmuşlar. Əgər DTGB-nin ilk qurultayına (1992, Kazan, Tatarıstan) 8 nümayəndə heyəti qatılmışdısa, 13-cü qurultayda (2007, Ohri, Makedoniya) 36 nümayəndə heyəti iştirak etmişdir.
İndiyədək bir dəfə Türk Dünyası Gənclik günləri və qurultayı (2000-ci il), iki dəfə isə liderlər toplantısı (1993-1997-ci illər) Bakıda keçirilmişdir.
Bölmənin digər xəbərləri
