BAKIDA HAPKİDO ÜZRƏ BEYNƏLXALQ SEMİNAR KEÇİRİLİR
AZƏRTAC xəbər verir ki, Azərbaycan Hapkido Federasiyasının dəvəti ilə Dünya Koreya Döyüş Sənətləri Federasiyasının prezidenti, hapkido üzrə 9-cu dan qara kəmər sahibi Grand Master Suk Ku Kim ölkəmizdə səfərdədir.
Bununla bağlı sentyabrın 28-də keçirilən mətbuat konfransında Azərbaycan Hapkido Federasiyasının prezidenti Süleyman Məmmədli qonağın ölkəmizə səfərinin qarşılıqlı əməkdaşlıq çərçivəsində reallaşdığını bildirmişdir. Qonaq Bakıda məşqçilər üçün keçiriləcək üç günlük beynəlxalq seminarlara rəhbərlik edəcəkdir. Seminarlarda Azərbaycan, Rusiya, İran və Özbəkistan mütəxəsissləri iştirak edəcəklər.
Azərbaycana gəlişindən məmnunluğunu söyləyən qonaq demişdir ki, Koreya Respublikasının idman ictimaiyyəti hər zaman Azərbaycanda döyüş növlərinin inkişafına dəstək verəcəkdir. Gələn il Bakıda Avropa çempionatı keçirilməsinin nəzərdə tutulduğunu bildirən Suk Ku Kim Azərbaycan yığmasını ABŞ-ın Sakramento şəhərində baş tutacaq dünya kuboku turnirinə və Koreya Respublikasında təşkil olunacaq döyüş növləri üzrə Olimpiadaya dəvət etmişdir.
Süleyman Məmmədli Azərbaycanda hələlik bu idman növünün geniş vüsət almadığını bildirməklə yanaşı, son zamanlar gənclərin harkidoya marağının artmasını təqdirəlayiq hal hesab etmişdir. O demişdir ki, bu yaxınlarda Almaniyada keçirilən dünya çempionatında Azərbaycan idmançıları 6 qızıl, 3 gümüş və 2 bürünc medala layiq görülmüşlər.
Bölmənin digər xəbərləri
