BALAKƏNDƏ ƏHALİNİN İÇMƏLİ SU İLƏTƏMİNATI YAXŞILAŞDIRILIR
Balakən Rayon İcra Hakimiyyətindən AZƏRTAC-ın müxbirinə bildirmişlər ki, əhalinin içməli su ilə təminatının yaxşılaşdırılması üçün Hunbulçay su mənbəyindən rayon mərkəzinə çəkilən 4,5 kilometr uzunluğunda su xəttinin tikintisi başa çatmaq üzrədir. Xəttin tikintisinə indiyədək 220 min manat vəsait sərf edilmişdir. Bundan əlavə, Siltikçay su mənbəyindən 7,7 kilometr uzunluğunda digər su xəttinin çəkilməsi üçün dağlıq ərazidə aparılan yol tikinti işləri də artıq tamamlanmış və xəttin çəkilişinə başlanılmışdır.
Cari ildə həmçinin, Mazımçay kəndinə 3 kilometr məsafədən içməli su xətti çəkilərək sakinlərin istifadəsinə verilmiş, eyni zamanda Mahamalar kəndi ərazisində hər birinin tutumu 640 kubmetr olan su anbarlarının tikintisi də başa çatdırılmış, xəttin çəkilişi üçün lazım olan material və avadanlıqlar gətirilmişdir.
