2003-cü il iyulun 1-ə olan məlumata görə, 94 kredit təşkilatının bank əməliyyatları aparmaq üçün lisenziyası vardır. Milli Bankın mətbuat xidmətindən AZƏRTAC-ın müxbirinə bildirmişlər ki, onların 48-i qeyri-bank kredit təşkilatıdır.

Kredit təşkilatlarından 41-nin əhalidən vəsait cəlb etmək, 43-nün xarici valyuta, 1-nin qiymətli metallarla, 25-nin kredit kartları ilə əməliyyatlar aparmaq üçün icazəsi vardır.

Iyulun 1-ə olan məlumata görə, Azərbaycanda 46 bank fəaliyyət göstərir. 15 bank xarici kapitalın iştirakı ilə işləyir ki, onların da 5-də bu kapitalın payı 50 faizdən 100 faizədək, 8-də 50 faizdən azdır. 2 bank isə qeyri-rezident bankların filialıdır.

Kredit təşkilatlarının 268 filialı mövcuddur, xaricdə 1 filial, 2 nümayəndəlik və bir törəmə bankı fəaliyyət göstərir. Qeyri-bank kredit təşkilatlarının 16 filialı vardır.

Iyulun 1-ə olan məlumata görə, bankların nizamnamə kapitalı 689,7 milyard manat təşkil etmişdir ki, bu da yanvarın 1-ə olan göstəricidən 9,7 faiz çoxdur.

Nizamnamə kapitalının ümumi məbləğının 72 milyard manatı dövlət banklarının, 617,7 milyard manatı isə özəl bankların payına düşür. Xarici kapitalın iştriakı ilə yaradılmış bankların nizamnamə fondu 230,6 milyard manat təşkil edir, bu isə nizamnamə fondunun ümumi həcminin 33,4 faizi deməkdir.

Orta hesabla, hər banka 15,0 milyard manat nizamnamə fondu düşür.