BAŞ PROKURORLUQ ARAŞDIRMA APARMIŞDIR
Müəyyən edilmişdir ki, adları təhrif olunmaqla çəkilən həmin şəxslər mitinq başa çatdıqdan sonra, ictimai qaydanı pozan hərəkətlərə yol verdikləri və hakimiyyət nümayəndəsinə qarşı müqavimət göstərdikləri üçün polisə gətirilmiş və barələrində Yasamal Rayon Məhkəməsinin qərarı ilə 10 sutka müddətinə inzibati qaydada həbs cəzası tətbiq edilmişdir və onlar hazırda cəza çəkirlər. Məzahir Mehdiyev adlı şəxs isə ümumiyyətlə saxlanılmamış və həbs edilməmişdir.
Həmin şəxslərin təhrif olunmuş adlar altında axtarılmasının səbəbi yaşadıqları yerlərdə çağırıldıqları ayama adlarının AXCP-nin mətbuat xidməti tərəfindən qəzet və internet saytlarına ötürülməsi olmuşdur. İzahatı alınmış AXCP-nin mətbuat xidmətinin rəhbəri İsaq Əvəzoğlu bildirmişdir ki, 2005-ci ilin noyabrın 26-da keçirilən mitinq zamanı inzibati qaydada həbs edilmiş şəxslər barəsində qəbul edilmiş qərarların surətini, həmçinin Bakı şəhəri Binəqədi və Nəsimi RPİ-nin müvəqqəti saxlama təcridxanalarında həbs olunmuş şəxslərin siyahılarını ala bilmədiklərinə görə, özləri araşdırmalar aparmış və qeyri-dəqiq olan informasiyanı yaymışlar.
Əslində isə, inzibati qaydada həbs olunanlar Sabir Kərimov, Elman Ağayev və Bədəl Abbasovdur. Məlumatda İbrahim Mehdiyev də yanlış olaraq İbrahim İbrahimov kimi göstərilmişdir. Bu yazı ilə bağlı İ.Əvəzoğlu daha sonra bildirmişdir ki, yuxarıda qeyd olunan şəxslərin əsil adlarını və soyadlarını bilmir, onların adlarını mətbuatın məlumatında partiyanın rayon şöbələrindən və qohumlarından alınmış informasiyaya əsasən göstərmiş, həmin şəxslərin itkin düşməsi barədə onun özündə heç bir rəsmi ərizə olmamış, özü də hüquq mühafizə orqanlarına heç bir müraciət etməmişdir.
