REGİONLAR
BAYTAR MÜTƏXƏSSİSLƏRİ CƏBHƏ BÖLGƏSİNDƏN QAYITMIŞ VƏ İLKİN MÜAYİNƏLƏRİN NƏTİCƏLƏRİ BƏLLİ OLMUŞDUR
Dövlət Baytarlıq Xidmətinin mətbuat mərkəzindən AZƏRTAC-a bildirmişlər ki, qurum, yaranmış təhlükəni nəzərə alaraq, iyulun 24-dən 28-dək kimi baytar mütəxəssislərini işğal olunmuş ərazilərlə həmsərhəd rayonlara ezam etmişdi. Onlar bu bölgələrdə yanğından xilas olmuş heyvanların keçdiyi sahələrə baxış keçirmiş, nəzarət tədbirləri görmüş, əhali arasında sorğu aparmış, baş vermiş dəyişiklikləri monitorinq yolu ilə izləmiş, cəbhəyanı rayonların epidemioloji və epizootoloji vəziyyətlərinə diqqət yetirmişlər.
Mütəxəssislərin Tərtər, Ağdam və Beyləqan rayonlarından xüsusi tələlərə düşmüş tarla siçanı, siçovul, dovşan və çaqqaldan, digər müxtəlif heyvanlardan götürdükləri nümunələr ilkin olaraq Respublika Baytarlıq Laboratoriyasında müayinədən keçirilmişdir. Müayinə zamanı nümunələrin heç birində xüsusi təhlükəli xəstəliklərin amilləri müşahidə edilməmişdir. Müayinələr ardıcıl və lazımi qaydada davam etdirilir. Tələb olunan son nəticə avqustun 3-də bəlli olacaqdır.
Cəbhəyanı bölgədə aparılan monitorinqlərin yüksək səviyyədə həyata keçirilməsində, nümunələrin götürülməsində Səhiyyə Nazirliyinin müvafiq qurumlarının mütəxəssisləri də yaxından iştirak etmişlər.