BƏDİİ GİMNASTİKA ÜZRƏ NÖVBƏTİ AVROPA ÇEMPİONATI GƏLƏN İL BAKIDA KEÇİRİLƏCƏKDİR
AZƏRTAC xəbər verir ki, bədii gimnastika üzrə növbəti, 25-ci Avropa yubiley çempionatı Bakıda keçiriləcəkdir. Bu, Turində başa çatan indiki Avropa birinciliyinin bağlanması mərasimində rəsmən bildirilmişdir. Avropa Gimnastika İttifaqının prezidenti Dimitrios Dimitropulos bunun əlaməti olaraq UEG bayrağını Azərbaycan Gimnastika Federasiyasının vitse-prezidenti Altay Həsənova təqdim etmişdir. Güman edilir ki, 2009-cu ilin Avropa çempionatı Bakıda mayın ortalarında keçiriləcəkdir.
Turində Avropa çempionatının bağlanışı mərasimindən və Azərbaycana bayrağın təqdim edilməsindən əvvəl qrup komandalarının final yarışları olmuşdur. Vəfa Hüseynova, Anna Bitiyeva, Valeriya Yeqay, Alina Tryopina və Anastasiya Prasolovadan ibarət Azərbaycan kollektivi çoxnövçülüyün yekunlarına görə hər iki finalda iştirak etmək hüququ qazanmışdır.
Komandamız 5 iplə bir dəfə də səhvə yol vermədən məharətlə çıxış etmişdir. Nəticədə o, Rusiya və Ukrayna komandalarını qabaqlayaraq, final cədvəlində 6-cı yeri tutmuşdur. 3 halqa 4 gürz ilə hərəkətlərdə qrupumuz bir, lakin çox ciddi səhvə yol vermişdir - halqa xalçadan kənara sıçramışdır, bu isə hakimlər tərəfindən çox ciddi cəzalandırılır. Nəticədə qrupumuza 8-ci yer verilmişdir.
Çempionat həmişəki kimi qala-tamaşa ilə başa çatmış və orada Dinara Gimatova da çıxış etmişdir.
Bölmənin digər xəbərləri
