BERTİ FOQTS XARİCİ ÖLKƏLƏRDƏ YAŞAYAN İSTEDADLI AZƏRBAYCAN FUTBOLÇULARINI YIĞMAYA CƏLB ETMƏK NİYYƏTİNDƏDİR
AZƏRTAC xəbər verir ki, Azərbaycanın futbol üzrə yığma komandasının baş məşqçisi Berti Foqts mayın 28-də AFFA-da millinin qarşıdakı oyunları ilə bağlı mətbuat konfransı keçirmişdir.
Azərbaycan xalqını Respublika günü münasibətilə təbrik edən B. Foqts yığmaya cəlb olunmuş köməkçi məşqçi Yurqen Qede, qapıçıların hazırlığı üzrə məşqçi Uli Ştayn və fizioterapevt Frenki Brenneri ictimaiyyətə təqdim etmişdir.
B. Foqts iyunun 1-də Andorra, sonra isə Bosniya və Herseqovina ilə keçiriləcək yoldaşlıq oyunlarına toxunaraq demişdir ki, bu görüşlərdə nəticə böyük önəm kəsb etməyəcəkdir. Hər iki oyun futbolçuların fiziki hazırlığını yoxlamaq baxımından əhəmiyyət daşıyacaqdır.
Azərbaycan futbolunun səviyyəsinin artması üçün futbolçuların fiziki hazırlığına daha böyük diqqət yetirilməlidir. Bunun üçün məşq prosesində dəyişikliklərin olacağını bildirən B. Foqts yığma komandanın gücləndirilməsi üçün hər ay təlim-məşq toplanışlarının keçirilməsinin vacibliyini vurğulamışdır.
Baş məşqçi gələcəkdə Rusiya, Ukrayna və İranda yaşayan istedadlı Azərbaycan futbolçularının aşkarlanaraq, yığmaya cəlb oluna biləcəyini söyləmişdir.
Bölmənin digər xəbərləri
