Beynəlxalq riyakarlığın təzahürü ŞƏRH
Bakı, 26 yanvar, AZƏRTAC
Azərbaycanın uğurlarını, xüsusilə ərazi bütövlüyünün və suverenliyinin tam bərpasını həzm edə bilməyən dairələrin ölkəmizi gözdən salmaq, demokratik imicinə zərbə vurmaq üçün göstərdikləri cəhdlər diqqətdən kənarda qalmır. Avropa Şurasının Azərbaycan nümayəndə heyətinin səlahiyyətlərinin məhdudlaşdırılması ilə bağlı qərarı da Avropanın səmərəsiz cəhdlərinin tərkib hissəsidir. Dünya gücləri, onların əlində oyuncağa çevrilən Avropa Şurası kimi qurumlar Azərbaycana qarşı atdıqları addımların heç birinin əsası olmadığını, yalnız qərəz xarakteri daşıdığını çox yaxşı bilirlər. Azərbaycana hansı sahədən diqqət yetirsələr ölkəmizin davamlı uğurlarını görürlər. Azərbaycanın beynəlxalq əhəmiyyətli tədbirlər üçün ideal məkan kimi qəbul edilməsini şərtləndirən əsas amillərdən biri demokratik inkişafdır. Ölkəmizdə demokratik cəmiyyətin varlığını təsdiqləyən bütün amillər mövcuddur. İnsan hüquqları yüksək səviyyədə qorunur və yeni müdafiə mexanizmləri müəyyənləşdirilir, mətbuat azadlığı təmin olunub, çoxpartiyalı sistem yaradılıb, seçkilərin demokratik, azad, beynəlxalq standartlara uyğun keçirilməsi üçün biri-birindən mühüm addımlar atılır.
Bu fikirləri AZƏRTAC-a açıqlamasında Milli Məclisin deputatı Əliabbas Salahzadə söyləyib.
Demokratikləşmənin Azərbaycanın hərtərəfli inkişafının əsası olduğunu bildirən deputat deyib: “Elə ölkələr var ki, iqtisadi inkişafı yüksək səviyyədədir, amma demokratik inkişafdan danışmaq mümkün deyil. Elə ölkələr də var ki, əksinə, demokratik inkişafı ilə diqqətdədir, iqtisadi tərəqqi aşağı səviyyədədir. Azərbaycanda isə vəziyyət tamamilə fərqlidir. İqtisadi və siyasi islahatların vəhdətliyi ölkəmizin hərtərəfli inkişafında əsas amildir. Azərbaycan inkişafın təkmil modelini dünyaya təqdim etməklə daim diqqəti özünə yönəldir. Bu, ölkəmizin yürütdüyü siyasətin məqsədyönlülüyünə əminliyindən irəli gəlir. Bu kontekstdən yanaşdıqda AŞPA kimi qərəzi fəaliyyətlərinin əsasına çevirən qurumlar öncə özlərinin həyata keçirdikləri siyasətin hansı prinsiplərə söykəndiyinə diqqət yetirsələr daha yaxşı olar”.
Avropa Şurasını islamofob və türkofob təfəkkürlü nümayəndələrin düşərgəsi adlandıran deputat əlavə edib: “Uzun illər ərzində bu qurum Ermənistanın Azərbaycana qarşı təcavüzü və işğal faktına qarşı heç bir tədbir görməyib, yalnız heç bir hüquqi çəkisi olmayan bəyanatlar və qərarlar verməklə kifayətlənib. Halbuki, bir quruma üzv olan iki ölkədən birinin digərinin ərazisini işğal etməsi faktına görə ən azından işğalçının səs hüququ əlindən alına bilərdi. Avropa Şurasının işğalçı ilə işğala məruz qalan dövləti eyni vaxtda üzv qəbul etməsinin özü ədalətsizliyin təzahürüdür. Azərbaycan ilk gündən üzərinə düşən öhdəlikləri yüksək səviyyədə yerinə yetirdi. Bu fakt inkaredilməzdir ki, Azərbaycan kimi demokratik dəyərlərə sadiq olan, ədaləti və beynəlxalq hüququ dəstəkləyən, təkmil inkişaf modeli ilə diqqətdə olan bir ölkə ilə əməkdaşlıq dünya güclərinə dividend qazandırar. Son üç ilin reallıqları Azərbaycanın malik olduğu imkanların təqdimatıdır. Azərbaycan tarixi Zəfərə imza atmaqla həm regionda yeni reallıqlar yaratdı, həm də dünya siyasətində yeniliklərə yol açdı. 30 il dünyadan ədalət gözləyən Azərbaycan dünya güclərinin edə bilmədiklərini edərək kağız üzərində saralan BMT Təhlükəsizlik Şurasının 4 qətnaməsini təkbaşına icra etdi. Bu gün AŞPA kimi qurumların atdığı addımlar beynəlxalq riyakarlığın təzahürüdür. Azərbaycanın tarixi Zəfərini qəbul etməyən, regionda gərginliklərin yaradılmasında maraqlı olan əksər dünya gücləri bu təşkilatdan bir vasitə kimi istifadə etməyə çalışırlar”.
Azərbaycanın həmişə olduğu kimi, bu gün də sülh istədiyini vurğulayan Əliabbas Salahzadə deyib: “2020-ci ilin noyabrında müharibə bitdikdən dərhal sonra ölkəmiz sülh danışıqlarına başlamaq üçün təşəbbüs irəli sürdü və Ermənistanla sülh müqaviləsinin əsasını təşkil edəcək beş prinsipi təqdim etdi. Azərbaycan 30 illik işğaldan əziyyət çəkmiş və ədaləti özü bərpa etmiş ölkə olaraq yeni sülh prosesinin müəllifi oldu. AŞPA reallıqlara Ermənistanın müdafiəsi baxımından yanaşmasaydı, Azərbaycanın bu kimi sülh addımlarını yüksək dəyərləndirərdi. Siyasi korluq AŞPA-nın xəstəliyinə çevrilib”.
Bölmənin digər xəbərləri
