BMT: Fiziki imkanları məhdud olan insanlar daha çox problemlə üzləşirlər
Bakı, 11 iyun, AZƏRTAC
BMT Baş katibinin humanitar məsələlər üzrə müavini Əminə Məhəmməd fiziki və əqli imkanları məhdud olan insanlar üçün Dayanıqlı İnkişaf Məqsədi (SDG) üzrə problemlərin müzakirə olunduğu illik konfrans öncəsi mövcud vəziyyəti açıqlayıb.
AZƏRTAC BMT-nin məlumatına istinadla xəbər verir ki, Baş katibin müavini deyib: “Mesaj kəskindir: bu kateqoriyadan olan insanlar daha çox yoxsulluq, ifrat işsizlik, dərin qida və sağlamlıq böhranı, təhsilə, məşğulluğa və rəqəmsal texnologiyalara məhdud çıxışla üzləşirlər”.
Əlilliyi olan Şəxslərin Hüquqları haqqında Konvensiyanın (COSP18) iştirakçı dövlətləri konfransının 18-ci sessiyası fiziki və əqli qüsurlu insanların sosial inkişaf üçün hüquqları və töhfələri haqqında ictimaiyyətin məlumatlılığının artırılmasına diqqət yetirəcək.
Əlilliyi olan Şəxslərin Hüquqları Komitəsinin sədri Kim Mi-Yeon bildirib ki, hətta artan qlobal çağırışlar fonunda belə, əlilliyi olan şəxslərin hüquqları haqqında Konvensiya 20 illik əhəmiyyətini qoruyub saxlayır. O əlavə edib: Bu sənəd XXI əsrin ən mütərəqqi insan hüquqları müqaviləsidir... O, tibbi və xeyriyyəçilik modellərindən hüquqa əsaslanan yanaşmaya həlledici keçidi qeyd edir, eyni zamanda, struktur və gender əsaslı ayrı-seçkiliyi aradan qaldırmaq vəzifəsini təsdiqləyir”.
BMT-nin davam edən likvidlik böhranı fonunda Cənubi Koreyada keçirilən əlillərin məşğulluğu üzrə Beynəlxalq Forum da daxil olmaqla, bu kateqoriyadan olan insanların hüquqların gücləndirilməsi məsələsi gündəmdə yer alır.
Sosial inkişaf gündəliyi qarşıdan gələn iki böyük tədbirdən əvvəl fiziki imkanları məhdud olan şəxslərin hüquqları və sosial inkişafı üçün təkan yaratmağa davam etmək məqsədi daşıyır: noyabrda sosial inkişaf üzrə ikinci Dünya Sammiti və bu ayın sonunda İspaniyanın Sevilya şəhərində inkişaf üçün maliyyələşdirmə üzrə dördüncü beynəlxalq konfransda (FFD4) da bu kontekstdə mühüm qərarlar qəbul ediləcək.
İyunun 11-14-də keçirilən konfransda isə BMT və vətəndaş cəmiyyəti liderlərinin çıxışları olacaq, əlilliyi olan şəxslərin hüquqları və töhfələri ilə bağlı ictimai müzakirə və üç dəyirmi masa keçiriləcək. Bu tədbirlərdə maliyyə, süni intellektdən istifadə və əlilliyi olan yerli insanların hüquqlarının inkişafı məsələləri diqqət mərkəzində olacaq. Tədbir boyu hökumət rəsmiləri, vətəndaş cəmiyyəti nümayəndələri, BMT agentlikləri və ekspertlər strategiyaları və ən yaxşı təcrübələri bölüşəcəklər.
Bölmənin digər xəbərləri
