BMT-nin Ərzaq və Kənd Təsərrüfatı Proqramı: Bizim həyatımız arıların yaşamasından asılıdır
Bakı, 20 may, AZƏRTAC
Tozlandırıcıların əhəmiyyəti, üzləşdikləri təhlükələr və davamlı inkişafa töhfələri haqqında məlumatlılığı artırmaq üçün BMT 20 may tarixini Ümumdünya Arılar Günü elan edib.
AZƏRTAC BMT-nin rəsmi saytına xəbər verir ki, təşkilatın Ərzaq və Kənd Təsərrüfatı Proqramının (FAO) bu münasibətlə yaydığı müraciətin mətnində qeyd olunub: “Arılar və kəpənəklər, yarasalar kimi digər tozlandırıcılar getdikcə daha çox insan fəaliyyətinin yaratdığı təhlükəyə məruz qalır. Bununla belə, tozlanma ekosistemlərimizin sağ qalması üçün əsas prosesdir. Dünyadakı yabanı çiçəkli bitki növlərinin təxminən 90 faizi, eləcə də qida bitkilərinin 75 faizdən çoxu və qlobal kənd təsərrüfatı torpaqlarının 35 faizi tamamilə və ya ən azı qismən tozlanmadan asılıdır. Pollinatorlar təkcə qida təhlükəsizliyinə birbaşa töhfə vermir, həm də biomüxtəlifliyin qorunması üçün açardır”.
Müraciətdə qeyd olunub ki, hazırda qarşıda duran əsas vəzifə arıların və digər tozlandırıcıların qorunmasına yönəlmiş tədbirləri gücləndirməkdir ki, bu da qlobal ərzaq təminatı ilə bağlı problemlərin həllinə əhəmiyyətli töhfə verəcək və inkişaf etməkdə olan ölkələrdə aclığı aradan qaldıracaq. “Biz hamımız tozlandırıcılardan asılıyıq və buna görə də onların azalmasına nəzarət etmək və biomüxtəlifliyin itirilməsini dayandırmaq çox vacibdir. Arılar və digər tozlandırıcılar ekosistemlərin sağlamlığı və qida təhlükəsizliyi üçün əsasdır. Onlar biomüxtəlifliyin qorunmasına və qida məhsulları istehsalının təmin edilməsinə kömək edir. Bununla belə, intensiv monokultura istehsalı və pestisidlərdən düzgün istifadə edilməməsi tozlandırıcıların qida və yuva yerlərinə çıxışını azaldır, onları zərərli kimyəvi maddələrin mənfi təsirinə məruz qoyur və immun sistemlərini zəiflədir”.
FAO-nun müraciətində deyilir: “2023-cü il Ümumdünya Arılar Günündə tozlandırıcılara uyğun kənd təsərrüfatı istehsalına dəstək vermək üçün qlobal fəaliyyətə çağırır və xüsusən, elmi nailiyyətlərə əsaslanan aqrar istehsal təcrübələri vasitəsilə arıların və digər tozlandırıcıların qorunmasının vacibliyini vurğulayırıq”.
Mayın 19-da FAO-nun mənzil-qərargahında hibrid formatda keçirilən qlobal Ümumdünya Arılar Günü mərasimi arıları və digər tozlandırıcıları qorumaq üçün uyğun kənd təsərrüfatı istehsalı təcrübələrinin tətbiq edilməsinin vacibliyi barədə məlumatlılığı artırmaq sahəsində bir fürsət olub.
Bölmənin digər xəbərləri
