BMTM ekspertlərinin cəbhədə baş verən son hadisələrə dair məqalələri xarici mediada dərc olunub
Bakı, 1 oktyabr, AZƏRTAC
Beynəlxalq Münasibətlərin Təhlili Mərkəzi (BMTM) ekspertlərinin Ermənistan-Azərbaycan münaqişəsi ilə bağlı cəbhə xəttində baş Verən son hadisələrə dair davamlı olaraq xarici mediada məqalələri dərc olunub.
Beynəlxalq Münasibətlərin Təhlili Mərkəzindən AZƏRTAC-a bildirilib ki, qurumun aparıcı məsləhətçisi Orxan Bağırovun “Ermənistan regional əməkdaşlığı məqsədli sürətdə pozur” sərlövhəli məqaləsi ABŞ-da yerləşən “EurasiaReview” nəşri tərəfindən dərc edilib.
Məqalədə Ermənistanın Azərbaycan mövqelərinə hücum etməklə həyata keçirdiyi təxribatların regional əməkdaşlığa və bu əməkdaşlığın əsas komponentlərindən biri olan beynəlxalq əhəmiyyətə malik nəqliyyat layihələrinə necə təsir göstərməsindən bəhs edilir. Qeyd olunur ki, Ermənistan işğalçı siyasət həyata keçirməklə özünü regional layihələrdən təcrid edərək, Azərbaycan-Ermənistan münaqişəsinin uzanması və regional əməkdaşlığın korlanması üçün çalışan üçüncü qüvvələrin maraqlarına xidmət edir. Bu isə Ermənistanda sosial və demoqrafik vəziyyətin əhəmiyyətli dərəcədə pisləşməsinə səbəb olur. Belə olan halda, regional layihələrdən kənarda qalan və faydalana bilməyən Ermənistan hərbi təxribatlar törətməklə regional əməkdaşlığın inkişafına mane olmağa çalışır. Lakin Azərbaycanın malik olduğu geniş hərbi potensial imkan verir ki, Azərbaycan Ermənistanın hərbi təxribatlarının qarşısını alaraq öz torpaqlarını işğaldan azad etsin və regional nəqliyyat layihələrini hərbi təhlükədən qorusun.
BMTM-in digər aparıcı məsləhətçisi Şahmar Hacıyevin “Cənubi Qafqazdakı sülh prosesini Ermənistan niyə dağıtdı?” sərlövhəli məqaləsi “Foreign Policy News” nəşri tərəfindən dərc edilib.
Müəllif məqalədə Ermənistanın son təxribatlarının bu ölkənin müdafiə naziri David Tonoyan tərəfindən 2019-cu ilin martında elan edilmiş “yeni ərazilər üçün yeni müharibə” adlı yeni hərbi doktrinasının davamı olaraq icra edildiyini bildirib. Onun sözlərinə görə, Ermənistan rəhbərliyinin işğal altındakı ərazilərdə Livan ermənilərini qanunsuz olaraq yerləşdirməsi vəziyyəti daha da pisləşdirib. Hadisələrin bu cür inkişafı fonunda Ermənistan sentyabrın 27-də Azərbaycana qarşı daha bir genişmiqyaslı hərbi təxribat törədib. Ermənistan hərbi qüvvələri Azərbaycana qarşı iri çaplı silahlardan, minaatanlardan və digər silahlardan istifadə edərək hərbi qarşıdurma yaradıb. Azərbaycan öz əhalisini qorumaq və suverenliyini bərpa etmək məqsədilə özünümüdafiə və erməni hərbi qüvvələrinə qarşı əks-hücum təşkil etmək hüququndan istifadə edib və bu, BMT Nizamnaməsinin 51-ci maddəsinə müvafiq olaraq Azərbaycanın tam hüququdur.
Eyni zamanda, mərkəzin aparıcı məsləhətçisi Vasif Hüseynovun Polşadan yayımlanan “New Eastern Europe” jurnalının internet səhifəsində “Azərbaycan və Ermənistan geniş miqyaslı müharibəyə doğru gedir” başlıqlı və “The Greater Middle East” portalında “Ermənistanla Azərbaycan arasında müharibə güclənib” sərlövhəli məqalələr yayımlanıb. Müəllif məqalələrində Azərbaycanın Ermənistan tərəfindən təcavüzə məruz qalmasını, Ermənistan baş naziri Nikol Paşinyanın müharibəyə aparan təxribatçı xarici siyasətini və son otuz il ərzində aparılan sülh danışıqlarının Ermənistan hökumətləri tərəfindən status-kvonu saxlamaq üçün sui-istifadə edildiyini diqqətə çatdırıb. Məqalələrdə Azərbaycanın torpaqlarının işğalına son qoymaqda qətiyyətli olduğu və beynəlxalq ictimaiyyət tərəfindən tanınmış ərazi bütövlülüyün bərpasını tələb etdiyi vurğulanıb.
Bölmənin digər xəbərləri
