BMU tələbəsi: İki diplomu 4 il ərzində qazanmaq böyük üstünlükdür
Xırdalan, 6 avqust, AZƏRTAC
Bakı Mühəndislik Universiteti ilə Koreya Respublikasının İNHA Universiteti arasında icra olunan ikili diplom proqramının (BMU-İNHA İDP) “Elektronika mühəndisliyi” ixtisası üzrə tələbəsi Hakim Musazadə hər bir gəncin xaricdə təhsil arzularını və mühəndislik sahəsində seçilən universitetdə oxumaq xəyallarını birləşdirən bu proqramı özü üçün əla bir fürsət adlandırır.
BMU-dan AZƏRTAC-a bildirilib ki, H.Musazadə 2023-2024-cü tədris ili üzrə 675.1 bal nəticə göstərərək universitet birincisi olub. BMU tələbəsi proqramın üstünlüklərini sadalayıb, buradakı keyfiyyətli tədrisi, Koreyanın nüfuzlu şirkətləri ilə yaxından tanışlığı, sanballı akademik heyətdən dərs almağı, 3+1 modeli ilə 2 diplomu dörd il ərzində qazanmağı, bununla həm də vaxta qənaət etməyi gözəl şans kimi dəyərləndirib:”Keyfiyyətli təhsil mühiti güclü rəqabət atmosferi yaradır. Rəqabət isə həmişə inkişafa təkan verir”.
Beynəlxalq təhsil mühitinin tələbələrə qazandırdığı dostluqları da müsbət məqam kimi qiymətləndirən H.Musazadə əmindir ki, birinci ilini başa vurduğu proqram ona hələ daha çox gərəkli bacarıqlar qazandıracaq.
Bölmənin digər xəbərləri
