bp ŞİRKƏTİNDƏ İLİN YEKUNLARINA DAİR MƏTBUAT KONFRANSI KEÇİRİLMİŞDİR
ABƏŞ-in prezidenti bu il, əvvəlcədən proqnozlaşdırıldığı kimi, “Azəri-Günəşli-Çıraq” layihələri üzrə işlərə, ümumilikdə, 2 milyard 711 milyon dollar xərcləndiyini, gələn il isə əməliyyat xərclərinin 2 milyard 552 milyon dollar təşkil edəcəyini bildirmişdir.
Bakı-Tbilisi-Ceyhan boru kəmərinin tikintisində bu il 1 milyard 287 milyon dollarlıq iş görüldüyünü diqqətə çatdıran şirkət rəhbəri, Şahdəniz layihəsində tikintinin 88 faiz yerinə yetirildiyini, ümumi əsaslı xərclərin 1 milyard 290 milyon dollar olduğunu vurğulamışdır. “Dərin sulu Günəşli” layihəsi (Faza 3) üzrə işlərin 30 faizi, Cənubi Qafqaz Boru Kəmərinin çəkilişində 95 faizi görülmüşdür.
Qeyd edilmişdir ki, “Mərkəzi Azəri” platformasından gündəlik hasilat, orta hesabla, 240 min barrel olmuşdur. İlin sonunadək yataqdan ümumi hasilatın 39 milyon barreli ötəcəyi proqnozlaşdırılır.
Bu günədək “Çıraq” platformasından 48 milyon barrel neft hasil edilmişdir ki, bu da layihənin uğurla həyata keçirildiyinə sübutdur.
Natiq sağlamlıq, əməyin təhlükəsizliyi və ətraf mühit məsələlərinə xüsusi diqqət göstərildiyini vurğulayaraq demişdir ki, sosial sərmayə layihələrinə “Azəri-Günəşli-Çıraq” üzrə 1.596 milyon, BTC/CQBK marşrutu boyunca 4.176 milyon, Azərbaycanın digər rayonlarında 380 min, Şahdəniz üzrə 612 min ABŞ dolları sərf edilmişdir.
Yerli işçi heyətinin sayı bp şirkəti üzrə 1506 nəfər, BTC/CQBK-də 1300 nəfər, Şahdəniz layihəsində 2100 nəfər olmuş, “Azəri” layihəsində podratçılar vasitəsilə görülən işlərə isə 7 min 900 nəfər cəlb edilmişdir.
2006-ci ildə görüləcək işlər barədə danışan ABƏŞ prezidenti birinci rübdə ilk neftin Bakı-Tbilisi-Ceyhan ixrac boru kəməri ilə Ceyhan limanına çatacağını, digər layihələr üzrə mühüm addımlar atılacağını bildirmişdir.
ABƏŞ prezidenti və ayrı-ayrı layihələrin rəhbərləri jurnalistlərin suallarına da cavab vermişlər.
