Braziliyalı futbolçu: Yenidən “Qarabağ”da oynamaq istərdim
Bakı, 30 mart, AZƏRTAC
“Qarabağ”ı növbəti çempionluq münasibətilə təbrik edirəm”.
Bu sözləri AZƏRTAC-a açıqlamasında “Qarabağ”ın sabiq futbolçusu Çumbinyo keçmiş komandasının Azərbaycan Premyer Liqasında 11-ci çempionluğu əldə etməsi barədə danışarkən deyib.
O, Ağdam təmsilçisinin çempionatda yüksək səviyyədə çıxış etdiyini söyləyib: “Bu komanda hər il böyük uğurlar qazanır. “Qarabağ” Qurban Qurbanov kimi möhtəşəm baş məşqçiyə sahib olduğu üçün çox xoşbəxtdir. Oyunçular matçlara çox yaxşı köklənməyi bacarırlar. Heyətdəki futbolçular dəyişsə də, oyun üslubu hər zaman eyni qalır. Orada keçirdiyim günlərə görə özümlə qürur duyuram”.
38 yaşlı yarımmüdafiəçi növbəti illərdə də bu cür nəticələrin təkrarlanacağına inandığını deyib: “Qarabağ” bu il avrokuboklarda tarix yazdı. Onlar güclü komandalarla görüşlərdən üzüağ çıxdılar. “Bayer”lə matçlar inanılmaz idi. Təəssüf ki, növbəti mərhələyə yaxın olsalar da, bunu reallaşdıra bilmədilər. Bütün futbolçulara alqış düşür”.
Çumbinyo “Qarabağ”a qayıtmaq istəyini də gizlətməyib: “Bu komandanın rəhbərliyi oyunçulara dəyər verir. Yenidən orada oynamaq istərdim. Düşünürəm ki, indiki formam buna imkan verir”.
Qeyd edək ki, Çumbinyo 2013-cü ilin yayından 2016-cı ilin yanvarınadək Ağdam təmsilçisinin şərəfini qoruyub.
Bölmənin digər xəbərləri
