Britaniya-Azərbaycan Cəmiyyətinin rəhbəri: Xalqımız müstəqillik tariximizin yeni bir şanlı səhifəsinə imza atır
Bakı, 26 yanvar, AZƏRTAC
Bu il xalqımızın həyatında ən önəmli illərdən birinə çevrilmək üzrədir. Çünki xalqımız Azərbaycanın müstəqillik tarixinin yeni bir şanlı səhifəsinə imza atır. Otuz illik həsrətdən sonra ərazi bütövlüyü çərçivəsində prezident seçkilərinin keçirilməsi böyük tarixi hadisədir.
AZƏRTAC xəbər verir ki, bunu “secki-2024.az” saytına açıqlamasında Britaniya-Azərbaycan Cəmiyyətinin rəhbəri Fəridə Pənahova söyləyib.
Azərbaycanın işğal altında olan bütün torpaqlarını azad etdiyini xatırladan F.Pənahova deyib: “Tarixi ədalət bərpa olunub və hazırda Azərbaycanın bütün guşələrində üçrəngli Bayrağı dalğalanır. İşğaldan azad edilmiş ərazilərdə hazırda dövlətimiz tərəfindən bərpa və yenidənqurma işləri aparır. Öz ata-baba yurdlarına dönüş edən keçmiş məcburi köçkünlərin və ümumilikdə bütün azərbaycanlıların həyatında yeni bir dövr - Zəfər dövrü başlayıb. Mən də bu fürsətdən istifadə edərək öz icmamız adından qürur mənbəyimiz olan Azərbaycanın hər bir anının sülh və əmin-amanlıq içərisində keçməsi, torpaqlarımızın çiçəklənməsi və hər bir azərbaycanlının xoşbəxt yaşaması arzusu ilə xalqımıza müraciət edirəm: “Fevralın 7-nə təyin olunmuş prezident seçkilərində aktiv iştirak etsinlər”.
Bölmənin digər xəbərləri
