Britaniya şirkətinə 122,7 milyon funt sterlinq məbləğində cərimələnib
London, 28 may, AZƏRTAC
Böyük Britaniyanın ən iri su təchizatçılarından biri olan “Thames Water” şirkəti kanalizasiya əməliyyatları və səhmdarlara edilən ödənişlərlə bağlı qayda pozuntularına görə 122,7 milyon funt sterlinq məbləğində cərimələnib.
AZƏRTAC BBC-yə istinadla xəbər verir ki, bu, su təsərrüfatı üzrə tənzimləyici orqan “Ofwat” tərəfindən indiyədək verilmiş ən böyük cərimədir.
“Ofwat” bildirib ki, bu qərar qurumun ən böyük və ən mürəkkəb araşdırmasından sonra verilib və cərimə müştərilərin deyil, birbaşa şirkət və onun sərmayəçilərinin hesabına ödəniləcək. Cərimənin 104,5 milyon funt sterlinqlik hissəsi kanalizasiya fəaliyyəti ilə bağlı qayda pozuntularına görə, 18,2 milyon funt sterlinqlik hissəsi isə səhmdarlara edilən dividendlərlə bağlı pozuntulara görə tətbiq olunub. Bu, “Ofwat”ın bir su şirkətini dividendlərlə bağlı cərimələdiyi ilk haldır.
Qeyd edək ki, “Thames Water” son illərdə dəfələrlə kanalizasiya sızmaları və tullantı axıtmalarına görə ictimaiyyətin kəskin tənqidinə məruz qalıb.
Aytən Abbaslı
AZƏRTAC-ın xüsusi müxbiri
London
Bölmənin digər xəbərləri
