DÜNYA
BRİTANİYA SİYASƏTÇİLƏRİ İSRAİLİN “AYIRICI DİVAR” ÇƏKMƏSİNDƏN NARAZIDIRLAR
AZƏRTAC-ın İTAR-TASS-dan aldığı xəbərdə deyilir ki, Britaniya parlamentinin üzvləri Baş nazir Toni Bleyeri İsraili Fələstin ərazilərində “ayırıcı divar”ın tikintisini dayandırmağın zəruriliyinə inandırmaq məqsədi ilə ona güclü təzyiq göstərməyə çağırmışlar.
Hökumətin başçısına açıq müraciəti İcmalar palatasının 143 deputatı imzalamışdır. Məktub müəlliflərinin fikrincə, İsrailə təzyiq göstərmək üçün London öz tərəfdaşlarına – Avropa Birliyinə və Birləşmiş Ştatlara təsirindən istifadə etməlidir.
Müraciətdə bildirilir ki, “ayırıcı divar” irqi ayrı-seçkiliyin yeni formasıdır, çünki 400 min fələstinlini məşğulluqdan, təhsil və tibbi yardımdan məhrum edir. Siyasətçilər bəyan etmişlər: “Britaniya hökuməti bu divarla əlaqədar öz narahatlığını bildirmişdir, lakin biz Avropa Birliyi və ABŞ vasitəsilə İsrailə daha güclü təzyiq göstərməliyik”.