SİYASƏT
Brüssel formatındakı görüş Azərbaycanın diplomatik qələbələrindən biridir - Politoloq
Bakı, 19 may, AZƏRTAC
Brüssel görüşü noyabr ayından bəri dalana dirənən Azərbaycanla Ermənistan arasındakı əlaqələrin yenidən bərpa edilməsi baxımından vacib əhəmiyyətə malikdir. Nəzərə almaq lazımdır ki, Azərbaycan hər zaman Brüssel formatına öz sadiqliyini ifadə edib.
Bunu AZƏRTAC-a açıqlamasında Sosial Tədqiqatlar Mərkəzinin (STM) sektor müdiri, politoloq Tural İsmayılov bildirib. Onun sözlərinə görə, Prezident İlham Əliyev dəfələrlə vurğulayıb ki, Azərbaycan Brüssel səviyyəsində keçirilən görüşləri dəstəkləyir.
O qeyd edib ki, Avropa İttifaqı Şurasının Prezidenti Şarl Mişel digər bir çox qərb tipli diplomatlardan fərqli olaraq Azərbaycan və Ermənistan arasında münasibətlərin normallaşdırılması üçün daha səmimi təşviq prosesində iştirak edir. “Brüssel formatının dayanmasının ən böyük günahkarlarından biri Fransa və Ermənistan idi. Məhz Brüssel formatı dayandıqdan sonra həm delimitasiya və demarkasiya ilə bağlı, həm Azərbaycanla Ermənistan ərazisində yekun sülhlə bağlı proses dalana dirənmişdi. Amma bundan sonra artıq Brüssel formatının bərpa edilməsi çox pozitiv əhəmiyyətə malikdir”, - deyə politoloq sözlərinə əlavə edib.
Qeyd edib ki, Şarl Mişelin də açıqladığı kimi artıq yaxın aylar ərzində növbəti dəfə Brüsseldə görüş olacaq. Həmçinin bundan sonra Avropa İttifaqının moderatorluq etdiyi bir çox platformalarda və tədbirlərdə Azərbaycan və Ermənistan arasındakı münasibətlərin də müzakirə olunacağı anonsu verildi. Sadəcə olaraq bundan əvvəl imzalanmış 4 Brüssel bəyanatında Ermənistanın üzərinə götürdüyü öhdəliklər var ki, onlara Ermənistan təcili formada əməl etməlidir.
T.İsmayılov bildirib ki, sərhədlərin delimitasiya və demarkasiyası ilə bağlı Azərbaycan komissiya formalaşdırıb. Amma Ermənistan bu prosesi ləngitməyə çalışır. Brüssel bəyanatlarında delimitasiya və demarkasiyası ilə bağlı işlərin vacibliyi vurğulanır ki, bu, Vaşinqton və Moskva görüşlərində də əsas müzakirə mövzularından biridir. Eyni zamanda, Birinci Qarabağ müharibəsində əsir və itkin düşmüş 4000 Azərbaycan vətəndaşının taleyinə aydınlıq gətirilməsi, minalarla bağlı və digər xüsusi aktlarda Ermənistan üzərinə götürdüyü öhdəlikləri yerinə yetirməlidir.
Politoloq hesab edir ki, Avropa İttifaqının bu formatda müzakirələri davam etdirməsi, həmçinin Azərbaycanın ərazi bütövlüyünü dəstəkləməsi və sonuncu Brüssel görüşündə Paşinyanın Azərbaycanın ərazi bütövlüyünü tanıdığını vurğulaması ölkəmizin Brüssel formatında növbəti diplomatik qələbələrindən biridir.