Bu gündən Tacikistanda koronavirusa qarşı vaksinasiya prosesinə başlanılıb
Düşənbə, 23 mart, AZƏRTAC
Martın 23-də Tacikistan paytaxtındakı “İstiqlol” klinikasında koronavirusa qarşı kütləvi vaksinasiyaya başlanılıb.
AZƏRTAC Tacikistan mətbuatına istinadla xəbər verir ki, ilk olaraq ölkənin səhiyyə və sosial müdafiə naziri Camoliddin Abdullazoda və onun müavinləri, həmçinin UNICEF-in Tacikistandakı nümayəndəliyinin rəhbəri Osama Makkavi, BMT-nin Tacikistandakı Daimi Əlaqələndiricisi Sezin Sinanoğlu, Dünya Səhiyyə Təşkilatının bu ölkədəki nümayəndəsi Viktor Olşavski “AstraZeneca” vaksini ilə peyvənd olunublar.
Əhalinin peyvəndlənməsi ilə bağlı Respublika Komissiyası yaradılıb. Kütləvi peyvəndləmə üçün ölkədə 3 min tibb məntəqəsi təşkil edilib. Qeyd olunur ki, indiyədək Tacikistana COVAX proqramı çərçivəsində 192 min doza “AstraZeneca” vaksini gətirilib və bu proses mərhələ-mərhələ davam edir.
Komissiyanın yaydığı məlumata görə, ilk olaraq tibb işçiləri, yaşı 60-dan yuxarı olanlar, iqtisadiyyatın strateji sahəsində çalışanlar, elm və təhsil işçiləri, xroniki xəstəliklərdən əziyyət çəkənlər peyvənd olunacaqlar.
Qulu Kəngərli
AZƏRTAC-ın xüsusi müxbiri
Düşənbə
Bölmənin digər xəbərləri
