Bu ilin on ayında Rusiyadan Türkiyəyə turist axını 26 faiz artıb
Bakı, 4 dekabr, AZƏRTAC
2023-cü ilin yanvar-oktyabr aylarında Rusiyadan Türkiyəyə turist axını ötən ilin eyni dövrü ilə müqayisədə 26 faiz artaraq 5,8 milyon nəfərə çatıb.
AZƏRTAC xəbər verir ki, bu barədə Rusiya Turoperatorları Assosiasiyasının dərc etdiyi məlumatda deyilir.
“Rusiya yanvar-oktyabr aylarında Türkiyəyə turist axınına görə birinci yeri tutub. Həmin dövr ərzində bu ölkəyə 5 milyon 838 min 203 rusiyalı səfər edib ki, bu da Türkiyəyə ümumi xarici turist axınının 21 faizini təşkil edib. Bu göstərici 2022-ci ilin yanvar-oktyabr ayları ilə müqayisədə 26 faiz çoxdur”, - deyə məlumatda bildirilir.
Rusiyalı turistlərin ən çox səfər etdiyi bölgə ənənəvi olaraq Antalyadır. 2023-cü ildə 3,3 milyon rusiyalı Antalyada istirahət edib. Bu, ötən ilin müvafiq dövrü ilə müqayisədə 17,5 faiz çoxdur. Həmçinin cari ilin on ayında Rusiyadan İstanbula turist axını 47 faiz artaraq 1,7 milyon nəfərə çatıb.
Qeyd edək ki, Türkiyəyə gələn xarici turistlərin sayına görə Almaniya ikinci, Böyük Britaniya isə üçüncü yerdə qərarlaşıb.
Bölmənin digər xəbərləri
