Budapeşt Avropanı “hərbi psixozdan” çəkinməyə çağırır
Budapeşt, 3 iyul, AZƏRTAC
“Avropa əsl fəlakətlə üz-üzədir, çünki bu məkanda hələ də “hərbi psixoz” davam edir.
AZƏRTAC xəbər verir ki, bu xəbərdarlıq Macarıstanın xarici işlər və ticarət naziri Peter Siyyartonun özünün feysbuk səhifəsində yerləşdirdiyi statusda yer alıb.
P.Siyyarto yazıb: “Təəssüf ki, Avropa sözün həqiqi mənasında əsl fəlakətə yaxınlaşır”. O, həmçinin əlavə edib ki, regionda hələ böyük fəlakətin qarşısını almaq və minlərlə insanın həyatını xilas etmək mümkündür. Lakin bunu etmək üçün “hərbi psixoza” son qoyulmalıdır.
Macarıstanın naziri vurğulayıb ki, onun ölkəsi Ukraynada atəşin dərhal dayandırılmasında israrlıdır və münaqişəyə aidiyyəti olan siyasətçiləri danışıqlar masası arxasında müzakirələrə çağırır.
Bundan əvvəl Macarıstanın Baş naziri Viktor Orban bəyan etmişdi ki, Avropa İttifaqı Ukraynaya hərbi və iqtisadi yardım göstərməklə yanaşı, Balkan ölkələrinin Avropaya inteqrasiyasına da maliyyə vəsaiti ayırmalıdır. Onun sözlərinə görə, Budapeşt Balkan ölkələrinin, o cümlədən Bosniya və Herseqovinanın Avropa İttifaqına qoşulması istiqamətində səy göstərir.
Bölmənin digər xəbərləri
