CƏBRAYILLILAR DÖVLƏTİMİZİN BAŞÇISININ TAPŞIRIQ VƏ TÖVSİYƏLƏRİNİ DÖNMƏDƏN YERİNƏ YETİRƏCƏKLƏR
Rayon icra hakimiyyətinin başçısı Mahmud Quliyev, rayon maliyyə şöbəsinin rəisi Famil Balayev, Dövlət Sosial Müdafiə Fondu rayon şöbəsinin müdiri Əliağa Əhmədov, “KapitalBank”ın rayon filialının baş mühasibi Muxtar Cəfərov, rayon rabitə qovşağının rəisi Məmməd Əliyev və başqaları ölkəmizin başçısının nitqində irəli sürülən müddəaları iftixar hissi ilə xatırlatmışlar. Onlar bu ilin birinci yarısında da iqtisadi inkişaf baxımından Azərbaycanın dünyada liderliyi əlində saxlamasını, adambaşına düşən xarici sərmayəyə görə bölgədə aparıcı yerlərdən birini tutmasını, ümumi daxili məhsulun 36, əhalinin real gəlirinin 12, pul gəlirinin 18, orta aylıq əməkhaqqının 20, sənaye istehsalının 41 faiz artmasını, iqtisadiyyatımıza 3 milyard ABŞ dolları məbləğində sərmayə qoyulmasını, valyuta ehtiyatlarımızın 3 milyard dollara çatmasını Prezident İlham Əliyevin əsaslandırılmış iqtisadi siyasətinin, balanslaşdırılmış xarici siyasətinin nəticəsi kimi qiymətləndirmişlər. Xüsusi vurğulamışlar ki, ölkədə aparılan uğurlu iqtisadi siyasət insanların rifah halının yaxşılaşmasına gətirib çıxarmışdır. Qeyd edilmişdir ki, ümummilli lider Heydər Əliyevin neft strategiyasının uğurla icra edilməsi sayəsində valyuta ehtiyatımız daha da artacaq və bütün problemlərimizin həlli üçün zəmin yaranacaqdır. Natiqlər ölkəmizin başçısının bazarlarda qiymət artımının qarşısının alınması istiqamətində atdığı qətiyyətli addımlardan razılıqla danışmışlar.
Mahmud Quliyev məruzəsində qeyd etmişdir ki, ümummilli liderimiz Heydər Əliyevin təşəbbüsü ilə çəkilmiş və onun adını daşıyan Bakı-Tbilisi-Ceyhan əsas ixrac neft kəmərinin işə salınması, Azərbaycanın digər beynəlxalq və regional layihələrin iştirakçısı olması onun bölgədə və dünyada rolunu və nüfuzunu artırmışdır. Natiq toplantı iştirakçılarının diqqətini sosial ədalət prinsipinin gözlənilməsini ön plana çəkməyin, yoxsulluq həddində yaşayanların mənafeyini etibarlı şəkildə qorumağın vacibliyi barədə Prezidentin tələbinə yönəltmişdir.
Mahmud Quliyev dövlətimizin başçısının nitqində qaçqın və məcburi köçkünlərin problemlərinin bir nömrəli məsələ olduğunun bir daha bəyan edildiyini xatırlatmış, Biləsuvar rayonu ərazisində salınmış yeni qəsəbələrdə, cəbrayıllıların sıx məskunlaşdığı digər yaşayış məntəqələrində doğma yurdlarından didərgin düşmüş soydaşlarımızın sosial-məişət şəraitinin yaxşılaşdırılması və məşğulluğunun artırılmasına, regionların sosial-iqtisadi inkişafı Dövlət proqramlarına əsasən görülmüş işlərdən danışmışdır.
Qeyd olunmuşdur ki, proqramların icra olunduğu müddətdə rayontabeli bir neçə idarə və müəssisə yaradılmış, Ermənistan silahlı qüvvələri Cəbrayılı işğal edəndən sonra işləməyən bəzi müəssisələrin fəaliyyəti bərpa olunmuşdur. Qəsəbələrdə sahibkarlıqla məşğul olmaq, fərdi xidmət obyektləri tikmək üçün fiziki və hüquqi şəxslərə torpaq sahələri ayrılmış, artıq 129 belə obyekt tikilmiş və fəaliyyətə başlamışdır. Bu ilin martında aqroservis müəssisəsi yaradılmışdır. Yeni açılmış müəssisə və obyektlərdə 731 nəfər daimi işlə təmin edilmişdir.
M.Quliyev qəsəbələrdə məskunlaşmış əhalinin fərdi təsərrüfatı barədə məlumat verərək demişdir ki, bu təsərrüfatlarda qaramalın və davarın sayı ilbəil artır. Hazırda onların sayı müvafiq olaraq 8 min 790 və 97 min 162 başdır. Əhali 2 min 920 hektarda əkin-biçinlə məşğuldur. Bu mövsümdə 2 min 680 hektardan 7 min tona yaxın məhsul götürülmüşdür.
Natiq xüsusi vurğulamışdır ki, qəsəbələrin ərazisində əkilmiş taxıl sahələrinin hamısı, digər ərazilərdəki zəmilərin isə əksəriyyəti Azərbaycan Prezidenti İlham Əliyevin tapşırığı ilə əvəzsiz olaraq rayona verilmiş 2 kombayn və aqroservis müəssisəsinin texnikası vasitəsilə biçilmişdir.
Rayon icra hakimiyyətinin başçısı əhaliyə müavinətlərin plastik kartlarla ödənilməsinə başlandığını, büdcədən maliyyələşən idarə, müəssisə və təşkilatların bu sistemə keçmək üçün hazırlıq işlərinə başlandığını xatırlatmışdır.
Toplantının iştirakçıları əmin etmişlər ki, cəbrayıllılar ölkəmizin başçısının tapşırıq və tövsiyələrini dönmədən icra etmək üçün səylərini əsirgəməyəcəklər.
Nazirlər Kabinetinin iclasında ölkə başçısının giriş və yekun nitqində qeyd edilmiş tapşırıq və tövsiyələrin yerinə yetirilməsinə dair tədbirlər planı müəyyənləşdirilmişdir.
Bölmənin digər xəbərləri
