İDMAN
Ceyhun Məmmədov: Əminik ki, samboçularımız Azərbaycan idmanının inkişafına yeni töhfələr verəcəklər
İlk Avropa Oyunlarının vətəni olan Azərbaycanı ikinci Avropa Oyunlarında yüksək səviyyədə təmsil etməyə çalışacağıq
Bakı, 17 noyabr, AZƏRTAC
Ölkəmizdə inkişaf etmiş idman növlərindən biri də sambo güləşidir. Sambo tarixinə adı qızıl hərflərlə yazılmış doqquzqat dünya, altıqat Avropa çempionu Ceyhun Məmmədov, beşqat dünya çempionu Zülfiyyə Hüseynova ilə yanaşı, dünya və Avropa çempionları, dünya kubokunun qalibləri Mövlud Mirəliyev, Şahmuraz Qasımov, Hakim Nəzərəliyev, Qalib Hümbətov, Sehriman Ağayev, Elçin Mayilov, Elşən Poladov, İntiqam Əzizov, Azər Cəfərov, Tərlan Poladov, Elşən Rəşidov, Bəxtiyar Hacıyev, İslam Qasımov və başqalarının qazandıqları böyük nailiyyətlər ölkəmizdə idmanın bu növündə güclü potensialın olduğunu göstərir.
AZƏRTAC-ın müxbiri Azərbaycan Sambo Federasiyasının prezidenti, Avropa Sambo Federasiyasının vitse-prezidenti, Əməkdar idman xadimi, “Şöhrət” ordenli Ceyhun Məmmədovla görüşərək bu idman növünün ölkəmizdə inkişafı, başa çatmaqda olan ildə əl ərzində edilən nailiyyətlər, perspektivlərlə bağlı müsahibə alıb. Müsahibəni təqdim edirik.
- Ceyhun müəllim, dünyanın ən güclü idman ölkələrindən biri olan Azərbaycan, həm də adlı-sanlı samboçular yetişdirib. Müasir idman tariximizdə sambonun inkişafı ilə bağlı hansı perspektivlər var?
- Sambo güləşi üzrə ən parlaq nailiyyətlər Azərbaycanın müstəqilliyini bərpa etdiyi müasir dövrdə qazanılıb. Bu da təsadüfi deyil. Dövlət tərəfindən idman sahəsinə göstərilən diqqət və qayğı sambonun tərəqqisi üçün də geniş üfüqlər açıb. Kütləviliyin təmin edilməsi uğurların davamlı olması üçün böyük imkanlar yaradıb. Uşaq və yeniyetmələr bu idman növünə sonsuz həvəs göstərirlər. Birinci Avropa Oyunlarından sonra bu maraq daha da artıb. Ümumiyyətlə, Avropada sambo çox populyardır və onun əhatə dairəsinin getdikcə genişlənməsi müasir idmanda sambonun böyük perspektivlərindən xəbər verir.
Sambonun mənası silahsız özünü müdafiə anlamını verir. Onun sirlərinə yiyələnən hər bir uşaq və yeniyetmədə özünəinam, əminlik yaranır. Son 15 ildə qazanılmış nəticələrə nəzər salsaq, görərik ki, elə bir beynəlxalq yarış olmayıb ki, pəhləvanlarımız oradan medalsız qayıtsınlar.
- Sambonun ölkəmizdə coğrafiyasının genişlənməsi və kütləviliyin təmin edilməsi baxımından görülən işlərlə bağlı məlumat verərdiniz. Qızlar arasında bu idman növünün inkişafı qənaətbəxşdirmi?
- Gəncə, Siyəzən, Mingəçevirdə bu idman növünün coğrafiyası bir az da genişlənib. Cənub rayonlarında, eləcə də Bakıətrafı rayonlarda yeni bölmələr açmağı planlaşdırırıq. Ümumiyyətlə, perspektivdə yeni bazaların qurulması, sambo akademiyasının təşkili ilə bağlı planlar var.
Qızların sambo ilə məşğul olması üçün də müəyyən addımlar atılır. Bildiyiniz kimi, birinci Avropa Oyunlarında qazanılan 4 gümüş medaldan biri qadınların payına düşüb. Yığma komandalarda aşağı yaş qruplarında qızlarımızın bu idman növünün sirlərinə yiyələnməsi üçün bir sıra tədbirlər planlaşdırılır. Çalışacağıq ki, kişilərdə olduğu kimi, qızlar arasında da yüksək nailiyyət əldə edənlərin sayı artsın.
- 2019-cu ildə Avropa qitəsinin ən nüfuzlu idman yarışları olan ikinci Avropa Oyunları keçiriləcək. Oyunlarda iştirak edəcək samboçular müəyyən edilibmi?
- Birinci Avropa Oyunlarında qadınlar və kişilər 4 çəki dərəcəsində mübarizə aparıblar. Növbəti oyunlarda isə həm kişilər, həm də qadınlar 9 çəki dərəcəsi üzrə qüvvələrini sınayacaqlar. Artıq lisenziya xarakterli yarışlar başa çatır. Dekabrın 15-də Avropa kubokundan sonra yeni reytinq cədvəlinə əsasən, oyunlarda iştirak edəcək idmançıların adlarına aydınlıq gələcək. Hesablamalarımıza görə, kişilər arasında 6 çəki dərəcəsi üzrə (52, 57, 62, 68, 74, 82 kq) lisenziyalar, demək olar ki, təmin edilib. Oyunlarda yüksək nəticələr əldə etmək üçün yığma komanda ilə mütəmadi təlim-məşqlər keçirilir. İlk Avropa Oyunlarında samboçularımız - Nəzakət Xəlilova (52 kq), İslam Qasımov (57 kq), Amil Qasımov (74 kq), Vasif Səfərbəyov (+100) gümüş medal qazanıblar. Avropa Oyunlarının vətəni olan Azərbaycanı növbəti yarışlarda ən yüksək səviyyədə təmsil etməyə çalışacağıq.
- Başa çatmaqda olan il samboçularımız üçün hansı uğurlarla yadda qalacaq?
- Bu ilin əvvəlindən indiyə qədər beynəlxalq arenalarda keçirilən yarışlarda idmançılarımız ölkəmizi layiqincə təmsil etməyə çalışıblar. Bu ilin martında Moskvada keçirilən Dünya Kubokunda Mehman Xəlilov (57 kq), Emil Həsənov (68 kq) fəxri kürsünün ən yüksək pilləsində qərarlaşıblar. Bir ay sonra yeniyetmələr və gənclər arasında Çexiyada keçirilən Avropa birinciliyində gənclərdə Eyvaz Baxşıyev (57 kq), yeniyetmələr arasında Vüqar Ağcayevin (75 kq) finalda mübarizə aparmaları, Vilayət Bayramovun (60 kq) bürünc medal qazanması yaxşı nəticədir.
Lisenziya xarakterli A kateqoriyalı beynəlxalq turnirlərdə xalça ustalarımızın uğurlarını xüsusi qeyd etmək istəyirəm. Eyni zamanda, digər beynəlxalq turnirlərdə nəticələr də qənaətbəxşdir. Bu ilin mayında qitə çempionatında təmsilçilərimiz idman sambosu üzrə 3, döyüş sambosu üzrə 1 bürünc medal qazanıblar.
Yeniyetmələr və gənclər arasında dünya birinciliyində isə gənc idmançımız Eyvaz Baxşıyev (57 kq) yüksək nəticəyə imza atıb. Bu yarışda rəqib tanımayan samboçunun güclü potensialı var və ona böyük ümidlər bəsləyirik. Gənclər arasında daha bir idmançımızın - Fuad Məmmədovun (62 kq) finalda mübarizə aparması onun da perspektivlərinin böyük olduğunu göstərir. Yeniyetmə idmançılarımız isə nüfuzlu turnirdə 4 bürünc medal qazanıblar.
Bir həftə bundan əvvəl yığma komandamız Buxarestdə 80-dən çox ölkədən samboçuların iştirak etdikləri dünya çempionatında qüvvəsini sınayıb. Emil Həsənov (68 kq) mundialda gümüş medal qazanıb. O, bu il Dünya Kubokunun qalibi və bir sıra beynəlxalq yarışların qalib və mükafatçısı olub.
Ümumiyyətlə, builki nəticələr sübut edir ki, yeniyetmələr, gənclər və böyüklərdən ibarət yığma komandalarımızda güclü potensiala malik samboçularımız mübarizə aparırlar. Şübhəsiz, bu nəticələri gələcəkdə daha da yaxşılaşdırmaqla bağlı görülən işlər davam edəcək. Əminik ki, samboçularımız Azərbaycan idmanının inkişafına yeni töhfələr verəcəklər.