CGTN kanalının saytında Ermənistanın Gəncəyə raket hücumu barədə xəbər yerləşdirilib
Pekin, 4 oktyabr, AZƏRTAC
Çin Mərkəzi Televiziyasının ingilis dilində yayımlanan CGTN (China Global Television Network) kanalının internet səhifəsində Gəncə şəhərinin Ermənistan tərəfindən atəşə tutulması barədə xəbər yerləşdirilib.
AZƏRTAC xəbər verir ki, Azərbaycanın Xarici İşlər Nazirliyinin açıqlamasına istinadla hazırlanan xəbərdə ermənilərin Azərbaycanın ikinci böyük şəhəri olan Gəncəyə raket hücumu nəticəsində mülki şəxslərdən bir nəfərin öldüyü, 4 nəfərin isə yaralandığı qeyd olunub. Xəbərdə bildirilir ki, Azərbaycan Ermənistanı beynəlxalq hüququn norma və prinsiplərinə əməl etməyi, Azərbaycanın işğal edilmiş ərazilərindən erməni silahlı birləşmələrinin dərhal və qeyd-şərtsiz çıxarılmasını tələb edən BMT Təhlükəsizlik Şurasının qətnamələrini yerinə yetirmək barədə xəbərdarlıq edib.
Qeyd olunur ki, ermənilər Gəncəyə raket hücumunu etiraf ediblər.
Bütün dünyada geniş oxucu kütləsi olan CGTN kanalının saytında Dağlıq Qarabağ münaqişəsi ilə bağlı digər materialda isə bildirilir ki, Azərbaycan Prezidenti İlham Əliyev oktyabrın 3-də sosial mediada Azərbaycan Ordusunun Suqovuşan da daxil olmaqla, bir neçə yaşayış məntəqəsini azad etdiyini bildirib. Azərbaycan Prezidenti bu münasibətlə hərbi birləşmə komandirini təbrik edib.
Xəbərdə Ermənistan Müdafiə Nazirliyinin mətbuat katibinin Azərbaycan Ordusunun bir neçə mövqeni ələ keçirdiyini dolayı yolla etiraf etdiyi bildirilib.
Xəbərdə habelə, Ermənistanın baş naziri Nikol Paşinyanın televiziya ilə xalqa müraciətində döyüşlər nəticəsində Ermənistanın çoxlu sayda hərbi texnikasının sıradan çıxması barədə etirafı da əksini tapıb.
Münaqişənin tarixindən söz açılan materialda qeyd olunub ki, sovet dövründə Dağlıq Qarabağ Azərbaycanın tərkibində muxtar bölgə olub. Keçmiş SSRİ-nin dağılması dövründə yaranan müharibə erməni silahlıları təkcə Dağlıq Qarabağı deyil, Soquvuşan da daxil olmaqla onun ətrafındakı bir neçə rayonu da tutublar. BMT Təhlükəsizlik Şurasının qəbul etdiyi bir neçə qətnamədə qoşunların həmin ərazilərdən çıxarılması tələb olunsa da, erməni tərəfi bu tələbləri qulaqardına vurur.
Məqalədə Prezident İlham Əliyevin "Əl-Cəzirə" televiziya kanalına müsahibəsində Ermənistan həmin ərazilərdən çıxmayanadək döyüşlərin dayandırılmayacağı ilə bağlı fikrinə də yer verilib. Qeyd olunub ki, Azərbaycan Prezidenti müsahibəsində münaqişənin həlli üçün vasitəçilik edən ATƏT-in Minsk qrupunun onilliklər boyu səyləri bir nəticə vermədiyini deyib. Azərbaycan Prezidenti bunun əsas səbəblərindən biri BMT Təhlükəsizlik Şurasının qətnamələrinin icrasına başlamaq üçün vasitəçilər tərəfindən təkid göstərilməməsini və təzyiqin olmamasını göstərib. "Bizim daha 30 il gözləməyə vaxtımız yoxdur. Münaqişə indi həll olunmalıdır",- deyə Prezident İlham Əliyev bildirib.
CGTN-nin materialında, həmçinin Ermənistanın Suriya, Livan və digər ölkələrdən terrorçu qrupların üzvlərini Azərbaycanın işğal edilmiş ərazilərinə cəmləşdirdiyi qeyd olunub.
Şahin Cəfərov
AZƏRTAC-ın xüsusi müxbiri
Pekin
Bölmənin digər xəbərləri
