Çin səhiyyə sahəsində süni intellektdən istifadəni genişləndirir
Bakı, 5 noyabr, AZƏRTAC
Çinin hakimiyyət orqanları yaxın illərdə diaqnostika, müalicə və xəstəliklərin idarə olunmasının səmərəliliyini artırmaq məqsədilə səhiyyə sistemində süni intellektdən istifadəni əhəmiyyətli dərəcədə genişləndirmək planlarını açıqlayıb.
AZƏRTAC “Sinxua” agentliyinə istinadla xəbər verir ki, Dövlət Səhiyyə Komitəsi və digər dörd təşkilat tərəfindən dərc edilən birgə sənədə əsasən, süni intellekt texnologiyaları icma və kənd sağlamlıq mərkəzləri də daxil olmaqla, 2030-cu ilədək bütün birinci səviyyəli səhiyyə müəssisələrində tətbiq edilməlidir.
Üçpilləli təsnifata görə, ikinci və yuxarı səviyyəli xəstəxanalardan klinik qərara dəstək sistemlərinə əsaslanan ağıllı diaqnostika kimi süni intellekt həllərinin tətbiqi tələb olunacaq. Sənəd, həmçinin xəstələrə qulluqda süni intellektin genişləndirilməsini tələb edir. Bu, tibb müəssisələrinə müalicənin bütün mərhələlərində inteqrasiya olunmuş “ağıllı” xidmətlər təklif etmək imkanı verəcək.
Çin epidemiyalarla bağlı intellektual sistemləri təkmilləşdirməyi də planlaşdırır. Nəzərdə tutulan yeni tədbirlər yoluxucu xəstəliklərin qarşısının alınması və monitorinqində real vaxt rejimində qərarların qəbulu üçün sürətli və məqsədyönlü dəstək təmin etməyə yönəlib.
Bölmənin digər xəbərləri
