ÇİNİN SZYANSİ ƏYALƏTİ PARLAMENT ÜZVLƏRİNİN AZƏRBAYCANA SƏFƏRİ
Çin Xalq Respublikasının Szyansi əyaləti xalq nümayəndələri məclisi Daimi komitəsi sədrinin müavini xuan Minsin başda olmaqla nümayəndə heyəti yanvarın 31-də Bakıya gəlmişdir.
Fevralın 1-də səhər qonaqlar Şəhidlər xiyabanını ziyarət etmiş, ölkəmizin müstəqilliyi və ərazi bütövlüyü uğrunda canlarından keçmiş cəsur oğul və qızlarımızın məzarları üstünə gül-çiçək qoymuşlar.
Sonra Milli Məclisdə nümayəndə heyətinin Azərbaycanın ali qanunvericilik orqanında fəaliyyət göstərən parlamentlərarası əməkdaşlıq üzrə işçi qrupunun üzvləri ilə görüşü oldu.
İşçi qrupunun rəhbəri deputat Əli Əhmədov Azərbaycan müstəqillik əldə edəndən sonra siyasi və iqtisadi sahələrdə aparılmış islahatlar, habelə Milli Məclisin beynəlxalq əlaqələri barədə qonaqlara ətraflı məlumat verdi. O, Çin iqtisadçılarının təcrübəsindən ölkəmizdə istifadə edilməsinin zəruriliyini vurğuladı.
Nümayəndə heyətinin rəhbəri Xuan Minsin Szyansi əyalətinin siyasi və iqtisadi həyatından, Azərbaycanın siyasi və iqtisadi strukturları ilə əməkdaşlığın perspektivlərindən danışdı.
Sonra çinli qonaqlar Milli Məclisin hüquq siyasəti və dövlət quruculuğu məsələləri daimi komissiyasının üzvləri ilə görüşdülər.
Komissiyanın üzvü, deputat Səyyad Salahlı qonaqlara daimi komissiyanın qanun yaradıcılığı fəaliyyəti barədə müfəssəl məlumat verdi. Cənab Xuan Minsin Szyansi əyaləti xalq nümayəndələri məclisindəki eyni komissiyanın işindən ətraflı danışdı, qanun yaradıcılığı sahəsində əməkdaşlığın vacibliyini bildirdi.
Milli Məclisdə görüşlərdən sonra çinli qonaqları iqtisadi inkişaf naziri Fərhad Əliyev qəbul etdi. Söhbətdə iqtisadi əməkdaşlığın inkişaf etdirilməsi məsələlərinə dair fikir mübadiləsi aparıldı.
Həmin gün Milli Məclis sədrinin müavini Gövhər Baxşəliyeva nümayəndə heyətini qəbul etdi.
Parlament sədrinin müavini qonaqları səmimiyyətlə salamlayaraq dedi ki, ölkəmizi Çin ilə qədim əlaqələr bağlayır. Hələ orta əsrlərdə Çindən Azərbaycana çini qablar gətirilir, oraya isə xalçalar aparılırdı. Müasir mərhələdə ölkələrimiz arasında intensiv əlaqələr dövrü Azərbaycan Prezidenti Heydər Əliyevin 1994-cü ildə Çinə səfərindən sonra başlanmışdır. Həmin səfər zamanı ÇXR rəhbərləri ilə aparılmış danışıqlar və imzalanmış mühüm sənədlər ölkələrimiz arasında əməkdaşlığın inkişafına güclü təkan vermişdir.
G.Baxşəliyeva parlamentlərarası əməkdaşlıq məsələlərindən də ətraflı söhbət açaraq, Milli Məclisin nümayəndə heyətinin 1996-cı ildə ÇXR-ə səfərindən, habelə Çin parlamenti başçısının 2000-ci ildə ölkəmizə səfərindən danışdı.
Nümayəndə heyətinin rəhbəri Xuan Minsin səmimi qəbula görə təşəkkürünü bildirərək, bu ilin aprelində Çinə səfər edəcək Azərbaycan parlament nümayəndə heyətini Szyansi əyalətinə də dəvət etdi.
Həmin gün nümayəndə heyətinin üzvlərinin Azərbaycanın kənd təsərrüfatı naziri İrşad Əliyev və xarici işlər nazirinin müavini Xələf Xələfov ilə də görüşdülər.
Çinli qonaqlar Azərbaycana səfəri davam edir.
Bölmənin digər xəbərləri
