Bakı, 9 mart, AZƏRTAC

İslam Əməkdaşlıq Təşkilatı (İƏT) Səudiyyə Ərəbistanının Ciddə şəhərində İslam İnkişaf Bankı (IsDB) və Axuvat Fondu ilə birlikdə “İƏT-ə üzv dövlətlərdə mikromaliyyə müdaxiləsi və iqtisadi inkişaf üçün Axuvat biznes modeli” mövzusunda seminar təşkil edib.

Təşkilatın Baş katibliyində AZƏRTAC-a bildiriblər ki, seminarda çıxış edən İƏT Baş katibinin iqtisadi məsələlər üzrə köməkçisi Əhməd Kavesa Sengendo dünyada və Yaxın Şərq-Şimali Afrika regionunda hökm sürən dərin iqtisadi böhran fonunda mikromaliyyə və iqtisadi imkanların genişləndirilməsi ilə bağlı gələcək tendensiyalar və proqnozlar haqqında məlumat verib. Onun sözlərinə görə, yoxsulluq İƏT-ə üzv dövlətlərin əksəriyyətinin, xüsusən də Afrikanın sub-səhra regionunda və Cənubi Asiyada sosial-iqtisadi inkişafı üçün ən böyük problemlərdən biri olaraq qalır. Ə.Sengendo əlavə edib ki, milyonlarla insanın yoxsulluq içində yaşadığı İƏT-ə üzv dövlətlərin bəzilərində gənclər arasında işsizliyin səviyyəsi 38 faizə çatır.

Ə.Sengendo vurğulayıb ki, İƏT ölkələrində yoxsulluğun aradan qaldırılması kiçik müəssisələr vasitəsilə özünüməşğulluq üçün münbit şərait yaradılmasından asılıdır. O qeyd edib ki, İƏT və onun müvafiq strukturları bir neçə mikromaliyyə və iqtisadi inkişaf proqramları hazırlayıb. Əsas məqsəd IsDB və digər maliyyə qurumlarının köməyi ilə İslam ölkələrində kiçik və orta sahibkarlığın inkişafına nail olmaqdır.

IsDB-nin qlobal təcrübələr və tərəfdaşlıq üzrə baş direktoru Əmir Bukviç çıxışında bildirib ki, sosial-iqtisadi inkişaf məsələlərinə ənənəvi yanaşma, xüsusən də çoxsaylı böhran dövrlərində kredit siyasəti özünü doğrultmur. Müvafiq qeyri-maliyyə xidmətləri göstərilmirsə, kiçik və orta şirkətlər həddindən artıq borclanmaya məruz qalır. Sosial-iqtisadi inkişaf və yeni iş yerlərinin açılması üçün gəlirli layihə imkanları, əlverişli dəstəkləyici infrastruktur, lazımi potensialın yaradılması, müvafiq və cəlbedici bazarlara çıxış və müasir texnoloji həllər ilə müşayiət olunan maliyyə xidmətləri olmalıdır. Bu amilləri nəzərə alan IsDB mikromaliyyə biznesinin daha da güclənməsi istiqamətində səylərini artırıb.

Seminarda vurğulanıb ki, yoxsul insanların maliyyə xidmətlərinə olan tələbatını ödəmək məqsədilə İƏT-ə üzv dövlətlərin bir neçəsində mikromaliyyə institutları (MMİ) yaranıb. 2001-ci ildən Pakistanda fəaliyyət göstərən Axuvat İslam Mikromaliyyə Proqramı (AIM) çərçivəsində cəmiyyətin marginallaşmış üzvlərinə həyat standartlarını yüksəltmək və dolanışıqlarını yaxşılaşdırmaq imkanı vermək məqsədi ilə faizsiz kreditlər təklif olunur. Bu təcrübə digər ölkələrdə də tətbiq edilə bilər.