COP29-un tələblərindən narahat olanlar Azərbaycana qarşı çirkin kampaniya təşkil edirlər ŞƏRH
Bakı, 4 noyabr, AZƏRTAC
Bakıda BMT-nin İqlim Dəyişikliyi üzrə Çərçivə Konvensiyasının Tərəflər Konfransının 29-cu sessiyasının (COP29) keçirilməsi ərəfəsində ölkəmizə qarşı çirkin kampaniyanın aparılacağı gözlənilən idi. Dünya dövlətlərinin Azərbaycana, onun Prezidentinə sərgilədiyi bu etimad - COP29-un ölkədə keçirilməsinə razılıq bəzi qüvvələrdə qısqanclıq yaratmaya bilməzdi. Bu gün həmin dairələr var gücləri ilə Azərbaycana qarşı hərəkətə keçiblər və nəcib qlobal təşəbbüsə kölgə salmağa çalışırlar. Həmin qüvvələri qlobal iqlim, insan haqları problemləri maraqlandırmır. Onların məqsədləri öz çirkin niyyətlərini həyata keçirmək üçün Cənubi Qafqazda gərginlik yaratmaq, sülhə və sabitliyə mane olmaqdır.
Bu sözləri AZƏRTAC-a açıqlamasında politoloq Ramiz Alıyev bildirib.
Beynəlxalq iqlim konfransı ərəfəsində ölkəmizin dünyanın diqqət mərkəzində olduğunu deyən politoloq qeyd edib ki, ötən il öz ərazisində separatizmin kökünü kəsərək suverenliyini bərpa edən Azərbaycana dünya ictimaiyyətinin inam və etimad göstərməsi tutduğumuz yolun düzgünlüyündən, beynəlxalq hüquqa söykənməsindən xəbər verir. Qırx dörd günlük Vətən müharibəsinin ən qızğın vaxtlarında, Ermənistanın hay-həşir salaraq bütün dünyaya kömək üçün yalvardığı bir dönəmdə Azərbaycana qarşı haqsız təzyiqlər, təhdidlər, qarayaxma kampaniyaları heç bir nəticə vermədi. İndi həmin qüvvələr “X” sosial media platformasında tam gücləri ilə hərəkətə keçiblər. COP29 əleyhinə genişmiqyaslı aktiv kampaniya aparan əksər profillər koordinasiya olunub. Saxta profillər #COP29 həştəqi altında eyni anda, eyni məzmunlu avtomatlaşdırılmış cavablar yerləşdirərək bot sistemləri vasitəsilə məzmun manipulyasiyası həyata keçirir. Onlar ictimai rəyi çaşdırmağa çalışırlar. Guya ölkə əhalisi sosial durumlarından narazıdırlar, COP29-un Azərbaycanda keçirilməsini istəmirlər və s. Hər zaman ölkəmizdə keçirilən mühüm tədbirlər öncəsi bu kimi qarayaxma və antitəbliğat kampaniyaları bizə çox tanışdır.
“Erməni lobbisinin, anti-Azərbaycan mərkəzlərinin belə cılız, iyrənc siyasətləri qlobal əhəmiyyətli beynəlxalq təşəbbüslərin qarşısını ala bilməz. Noyabrın 11-22-də keçiriləcək COP29 iqlim konfransı çərçivəsində dünyanın təxminən 190-dan çox ölkəsini təmsil edən 80-100 min nəfərə qədər nümayəndə heyəti Bakı şəhərinə gələcək. Azərbaycanın mötəbər tədbirə ev sahibliyi etməsi ölkəyə yerli, regional və beynəlxalq miqyasda çox böyük divindendlər qazandıracaq. Bizə qarşı çirkin kampaniya aparanlar bunu çox gözəl bilirlər. Onlar yaxşı başa düşürlər ki, Avropanın enerji təhlükəsizliyində əhəmiyyətli rol oynayan Azərbaycan “yaşıl” enerji ilə bağlı da ambisiyalı layihələrlə çıxış edir. Azərbaycan hökuməti 2030-cu ilə qədər enerji tələbatının 30 faizinin bərpaolunan mənbələr hesabına ödənilməsini hədəf kimi müəyyənləşdirib. Bərpaolunan enerji mənbələri iqlimlə bağlı hədəflərə nail olmaqda ən perspektivli həll yolu təklif edir. Azərbaycan istixana qazlarının 2030-cu ilə qədər 35 faizə, 2050-ci ilədək isə 40 faizə qədər azaldılması öhdəliyini götürüb. Yaşıl enerjinin istehsalı və dünya bazarına nəqli Azərbaycanın enerji siyasətində prioritet sahələrdən biridir. Böyük neft və qaz istehsalçısı olsa da Azərbaycanın əsas gündəliyi yaşıl enerji ilə bağlıdır. Azərbaycan COP29 iqlim konfransına 14 təşəbbüs irəli sürüb və bu təşəbbüslər qlobal xarakter daşıyır. Biz bu konfransda daxili problemlərimizin həllinə hesablanmış heç bir təşəbbüs irəli sürməmişik. Məqsəd isə qlobal səviyyədə yeni yanaşmalar və innovativ həll yolları təklif etməkdir. Azərbaycan COP29 zamanı inkişaf etmiş və inkişaf etməkdə olan ölkələr arasında körpü yaratmaq niyyətindədir”, - deyə R.Alıyev vurğulayıb.
Politoloq hesab edir ki, Azərbaycanın qlobal miqyaslı təşəbbüsləri bəzi dairələrin ürəyincə deyil. Dünyada qlobal iqlim problemlərini yaradan güclər həll yollarını təklif edən ölkələri gözdən salmaqla məşğuldurlar. Azərbaycana qarşı çirkin kampaniya aparanların maraqları COP29-un maraqları ilə üst-üstə düşmür.
Bölmənin digər xəbərləri
