“Creative Spark Big Idea” müsabiqəsinin finalçılarının adları açıqlanıb
Bakı, 6 iyul, AZƏRTAC
“British Council” 2021-ci ilin genişmiqyaslı videomüsabiqəsi olan “Creative Spark Big Idea”nın reallaşdırılması məqsədilə London Metropolitan Universiteti ilə səylərini birləşdirib. “British Council” təşkilatının Azərbaycandakı nümayəndəliyindən AZƏRTAC-a bildirilib ki, müsabiqə 18 və 35 yaş arasında olan gənclərə öz biznes ideyalarını irəli sürmələri və sahibkarlıq bacarıqlarını təkmilləşdirmələri üçün şərait yaradır. Gənc sahibkarlar, eyni zamanda, platforma sayəsində karyera perspektivləri və reputasiyalarını yüksəltmək imkanı əldə edirlər. Xüsusilə də gənclər arasında işsizliyin aktual olduğu və COVID-19 pandemiyasının bütün dünya iqtisadiyyatına təsir etdiyi dövrdə sözügedən təşəbbüs olduqca əhəmiyyətlidir. Bu il həm də yeni kateqoriya olan iqlim dəyişikliyi kateqoriyasında mükafatlandırma aparılacaq. Burada cəmiyyət diqqət mərkəzində olmaqla, yerli və milli səviyyədə, planetimizi və onun sərvətlərini qorumaq məqsədilə iqlim dəyişikliyinin ortaya çıxardığı problemlər və onların təsirlərini əhatə edən biznes fikirləri nümayiş etdirilir. Finalçılar, sahibkarlığın tədrisi və yaradıcı sahibkarlıq sahəsində yüksək təcrübəyə sahib beynəlxalq və milli münsiflər heyəti tərəfindən seçilib. İctimaiyyət “Xalqın seçimi” mükafatının qalibi seçmək üçün iyulun 18-dək https://creativespark-bigidea.uk/ veb-səhifəsində səsvermədə iştirak edə bilərlər. Ötən il, demək olar ki, 100 000-dək insan “Xalqın seçimi” mükafatının qalibini müəyyənləşdirmək üçün səsvermədə iştirak edib və komandalara beynəlxalq arenada olduqca dəyərli şans qazandırıb.
Azərbaycanda 2021-ci il “Creative Spark Big Idea” müsabiqəsinin finalçılarının adları elan edilib.
“İqlim dəyişikliyi” kateqoriyası üzrə finalçılar ADA Universitetindən Maniyə Xanlarzadə, İsmayıl Eyyublu, Fəxri Xanlarzadə, Xəzər Universitetindən Rəşid Cəfərov, İqtisadi İslahatların Təhlili və Kommunikasiya Mərkəzindən Tofiq Hidayətzadə və Vüsalə Sarxanovadır.
“Sosial təsir” kateqoriyası üzrə finalçılar Xəzər Universitetindən Təravət Əsgərova, Əbdürrəhman Eminov, Azərbaycan Dövlət İqtisad Universitetindən (UNEC) Hikmət Baloğlanov, Musiqi Akademiyasından Elnurə Sadıqovadır.
“Yaradıcı” kateqoriyası üzrə finalçılar Bakı Musiqi Akademiyasından Nicat Bağırov, Xəzər Universitetindən Əbdülcəlil Ömərov, Azərbaycan Dövlət Memarlıq və İnşaat Universitetindən Elnur Məmmədovdur.
“Rəqəmsal texnologiya” kateqoriyası üzrə finalçılar UNEC-dən Tural Salmanov, Aytac Mirzoyeva, Azərbaycan Memarlıq və İnşaat Universitetindən Gülnarə Mirzəyevadır.
Müsabiqə iyulun 5-18-də Azərbaycan da daxil olmaqla yeddi ölkədə keçiriləcək.
Qeyd edək ki, “Creative Spark” proqramı 2018-ci ildə yaradılıb. Həmin ildən proqram minlərlə tələbə, məzun və sahibkarlara innovativ biznes ideyaları ilə yenilik gətirməsinə dəstək göstərib.
Bölmənin digər xəbərləri
