Daniel Noboa Ekvadorun prezidenti seçilib
Bakı, 14 aprel, AZƏRTAC
Ekvadorun Milli Seçki Şurasının açıqladığı ilkin nəticələrə əsasən, hazırkı Prezidenti Daniel Noboa bazar günü keçirilən seçkilərin ikinci turunda dörd il müddətinə yenidən prezident seçilib.
AZƏRTAC xəbər verir ki, səslərin 92,64 faizinin hesablanmasından sonra 37 yaşlı Noboa 55,92 faiz, onun rəqibi solçu Luisa Qonsales isə 44,08 faiz səs toplayıb.
Milli Seçki Şurasının prezidenti Diana Atamaint Noboanı qələbə münasibətilə təbrik edib və bildirib ki, ikinci prezidentlik turunun nəticələrində “dönməz tendensiya” müşahidə olunub. Bu, “seçkilərdə ifadə olunan xalq iradəsinin sədaqətli əksidir”, – deyə o söyləyib.
Məlumatda qeyd olunub ki, seçkilər 13,7 milyondan çox seçicinin 83,76 faizinin iştirakı ilə keçirilib.
Nəticələri öyrəndikdən sonra Noboa Santa Elena əyalətindəki iqamətgahından tərəfdarlarına təşəkkür edib.
Bölmənin digər xəbərləri
