DAŞKƏND HAVA LİMANINDA QƏZAYA UĞRAMIŞ YAK-40 TƏYYARƏSİNİN “QARA QUTU”LARI TAPILMIŞDIR

14.01.2004 [12:21]
Çap et
A⁺ A^-

AZƏRTAC-ın müxbiri Daşkənddən xəbər verir ki, yanvarın 13-də Özbəkistan paytaxtının hava limanında qəzaya uğramış və şəxsi heyət də daxil olmaqla, 37 nəfərin həlak olduğu Yak-40 təyyarəsinin “qara qutu”ları tapılmışdır.

Özbəkistanın hüquq mühafizə orqanlarının nümayəndələri terror aktı törədilməsi versiyasını rədd edirlər. Onların fikrincə, qəzaya hava şəraitinin pisləşməsi və duman səbəb olmuşdur.

Yak-40 təyyarəsi şəhərin yaşayış məhəllələrinin bilavasitə 100 metrliyində yerləşən enmə zolağında qəzaya uğramışdır.

Özbəkistan Prezidenti İslam Kərimov Daşkənd hava limanına gələrək, vəziyyətlə şəxsən tanış olmuşdur.