DAXİLİ İŞLƏR NAZİRİ DAXİLİ QOŞUNLARIN XIZIDAKI TƏLİM MƏRKƏZİNDƏ OLMUŞDUR
Nazir yeni yaradılmış təlim mərkəzində qərargah, tibb məntəqəsi, çadır yataqxanaları, əsgər yeməkxanası və idman şəhərciyi, o cümlədən silahlı cinayətkarların tutulmasında və zərərsizləşdirilməsində istifadə olunan silah-sursatla tanış olmuş, Daxili Qoşunların “Aslanlar” adlanan xüsusi təyinatlı dəstələrinin və “N” saylı hərbi hissə əsgərlərinin dağ-meşə şəraitində göstərdikləri nümunəvi təlimlərinə baxmışdır.
Daxili Qoşunların komandanı, general-leytenant Zakir Həsənov bildirmişdir ki, dövlətimizin başçısı, Silahlı Qüvvələrin Ali baş komandanı İlham Əliyev Ermənistan-Azərbaycan, Dağlıq Qarabağ münaqişəsinin sülh yolu ilə həll edilməsi ilə yanaşı, digər variantları da daim diqqətdə saxlayır. Z.Həsənov qeyd etmişdir ki, Daxili Qoşunların şəxsi heyəti gündəlik döyüş hazırlığını yüksəltmək üçün əlindən gələni əsirgəmir. Bu gün dağ-təlim mərkəzində belə bir nümunəvi şəraitin yaradılması üçün biz Ali baş komandan İlham Əliyevə minnətdarıq.
Ramil Usubov əvvəlcə şəxsi heyətə Azərbaycan Prezidenti, Silahlı Qüvvələrin Ali baş komandanı İlham Əliyevin salamlarını çatdırmışdır. Nazir qeyd etmişdir ki, burada təlim mərkəzinin yaradılmasına ölkəmizin Prezidentinin göstərişi əsasında təqribən bir il bundan əvvəl başlanmışdır. Bu gün çox fərəhli haldır ki, müasir standartlara cavab verən bu təlim mərkəzi tikilib istifadəyə verilmişdir. Terrorçu silahlı qrupların dağ şəraitində zərərsizləşdirilməsi üçün belə bir təlim mərkəzinə böyük ehtiyac var idi.
Daxili qoşunların əsgər, gizir, zabit heyətinin yüksək peşəkarlığa malik bir qurum kimi yetişdiyini deyən daxili işlər naziri vurğulamışdır ki, Azərbaycan Prezidenti İlham Əliyev bütün sahələrdə olduğu kimi, ordu quruculuğunun inkişafı üçün də böyük işlər görür. Nazir qeyd etmişdir ki, Azərbaycan Silahlı Qüvvələrinin bütün şəxsi heyəti torpaqlarımızın azad edilməsi üçün hər an öz yüksək peşəkarlığını göstərib, düşmənə sarsıdıcı zərbə endirməyə hazırdır.
R.Usubov bildirmişdir ki, Daxili Qoşunların şəxsi heyəti ölkəmizdə silahlı dəstələrin, terrorçu qrupların zərərsizləşdirilməsi, peşəkarlıq səviyyəsinin artırılması üçün mühüm işlər görmüşdür. Bu qurumdakı yüksək nizam-intizam, peşəkarlıq onların əsas fəaliyyət istiqamətidir. Azərbaycanın Daxili Qoşunları daxili işlər orqanlarının ayrılmaz hissəsi kimi, həmişə Vətənə, dövlətə, dövlətçiliyə, Ali baş komandana sadiq olublar, bundan sonra da bu ənənə davam etdiriləcəkdir.
Nazir şəxsi heyət adından dövlətimizin başçısı, Silahlı Qüvvələrin Ali baş komandanı İlham Əliyevi əmin etmişdir ki, Daxili Qoşunlar hər an onun əmrini yerinə yetirməyə hazırdır.
Sonra nazir Qarabulaq kəndindəki mərkəzlə də tanış olmuşdur.
Tədbirdə Xızı Rayon İcra Hakimiyyətinin başçısı Tahir Quliyev, bir sıra dövlətlərin ölkəmizdəki səfirliklərinin hərbi attaşeləri iştirak etmişlər.
