DEBAT TURNİRİN QALİBİ MƏDƏNİYYƏT VƏ İNCƏSƏNƏT UNİVERSİTETİNİN KOMANDASI OLMUŞDUR
Bakı, 26 may (AZƏRTAC). Gəncliyə Yardım Fondunda “İRƏLİ” və “Vətəndaş Cəmiyyətində Debat” İctimai Birlikləri arasında Azərbaycanda debat proqramının birgə inkişaf etdirilməsi haqqında 5 illik müqavilə imzalanmışdır.
“İRƏLİ”nin sədri Ceyhun Osmanlı və “Vətəndaş Cəmiyyətində Debat” İctimai Birliyinin icraçı direktoru Şahin Seyidzadə birgə əməkdaşlığın əhəmiyyətindən danışmış, debatların gənclər üçün əsl intellektual yarış olduğunu vurğulamışlar.
Bildirmişlər ki, xüsusi təlim keçmiş tələbələr “Dövlətin inkişafı insan kapitalı siyasətindən asılıdır” mövzusunda Bakı şəhəri gənclərarası Karl Popper formatında açıq debat turnirində uğurla iştirak etmişlər.
Sonra tədbirdə 40-a yaxın komanda arasında finala vəsiqə qazanmış Azərbaycan Dövlət İqtisad Universitetini və Azərbaycan Dövlət Mədəniyyət və İncəsənət Universitetini təmsil edən komandalar qarşılaşmışlar.
Qalib olan Azərbaycan Dövlət Mədəniyyət və İncəsənət Universitetinin komandası kubok və medallarla təltif edilmişdir.
Bölmənin digər xəbərləri
