Deputat: ADA Universitetində keçirilən konfrans ölkəmizin sülhsevər mövqeyinin dünyaya çatdırılması baxımından əhəmiyyətli oldu
Bakı, 16 aprel, AZƏRTAC
ADA Universitetində keçirilən “Cənubi Qafqaza yeni baxış: münaqişədən sonra inkişaf və əməkdaşlıq” adlı beynəlxalq konfrans dünyanın aparıcı beyin mərkəzlərinin nümayəndələrinin iştirakı və Prezident İlham Əliyevin suallara yüksək peşəkarlıqla verdiyi cavablar ilə yadda qaldı. Prezident İlham Əliyev dünyanın müxtəlif beyin mərkəzləri təmsilçilərinin suallarını cavablandırarkən keçmiş münaqişənin tarixindən, onun həlli ilə bağlı aparılan uzunmüddətli və səmərəsiz danışıqlardan, erməni vandalizminin ifşasından, Azərbaycan Ordusunun qəhrəmanlığından, dost ölkələrin beynəlxalq hüququn və ədalətin yanında olmasından, Ermənistanın təcavüzkarlıq siyasətini və faşist əməllərini dəstəkləyənlərdən danışdı. Azərbaycanın Cənubi Qafqaz regionunda yaratmış olduğu yeni reallıq, eləcə də münaqişədən sonra yaranmış inkişaf və əməkdaşlıq imkanlarının da müzakirə olunduğu bu konfrans ölkəmizin sülhsevər, humanist və əməkdaşlığa açıq mövqeyinin dünyaya çatdırılması baxımından mühüm əhəmiyyət kəsb edir.
AZƏRTAC xəbər verir ki, bu fikirləri Milli Məclisin deputatı Tamam Cəfərova bildirib.
Deputat deyib ki, dünya ictimaiyyəti Vətən müharibəsindəki parlaq Qələbəmizdən sonra yaranmış reallığa uyğun mövqeyimizlə bir daha tanış oldu. Prezident İlham Əliyev indiki mövcud vəziyyət və Azərbaycan tərəfinin yaratdığı yeni reallıq, bölgədə uzunmüddətli sülhün, əmin-amanlığın təmin olunması, müharibə risklərinin minimuma endirilməsi, eyni zamanda, yeni əməkdaşlıq platformalarının yaradılması, kommunikasiyaların açılması və bölgə ölkələrinin inkişafı ilə bağlı mövcud vəziyyəti geniş təhlil etdi. Deputat vurğulayıb ki, Azərbaycanın qazandığı Qələbə ölkənin və bütöv regionun sürətli inkişafı üçün əsaslı zəmin yaradıb, yaranmış vəziyyətə uyğun olaraq Azərbaycan yeni əməkdaşlıq platforması təklif edir və bu platformaya uyğun olaraq 10 noyabr tarixli üçtərəfli Bəyanata müvafiq addımlar atır. Bu nöqteyi-nəzərdən Azərbaycan xalqının Qələbəsi dövlətimizin iqtisadi, siyasi gücünün artmasının, eləcə də beynəlxalq mövqelərinin möhkəmlənməsinin məntiqi nəticəsidir.
Qeyd olunub ki, Azərbaycan ilə Ermənistan arasında əməkdaşlıq körpülərinin yaranması üçün konstruktiv mövqe sərgilənməlidir. Ermənistandan fərqli olaraq, Azərbaycan hər zaman bütün məsələlərdə konstruktiv mövqe sərgiləyib və həmişə beynəlxalq hüququn tərəfdarı olub. Prezident İlham Əliyevin sözləri ilə desək, “azərbaycanlılar və ermənilərin qarşılıqlı əlaqəsi istəkdən və siyasətçilərin müdrikliyindən asılıdır. Dövlətimizin başçısı diqqətə çatdırıb ki, Bakıda və İrəvanda körpülər qurmaq üçün fəal olmalıyıq. Ermənistan müxalifəti təşvişdədir, azərbaycanofobiya, türkofobiya əvvəllər olduğu kimi, indi də onları narahat edir. Əməkdaşlıq körpülərinin qurulması üçün Ermənistan tərəfi özünün yaratdığı ideoloji doqmalarından əl çəkməlidir.
Tamam Cəfərova vurğulayıb ki, Azərbaycan müharibə dövründə də məsuliyyətli ölkə kimi davranıb. Azərbaycan XXI əsrin müharibəsini aparmaqla yanaşı, mənəviyyat müharibəsi də aparıb. Müharibə zamanı hərbi qulluqçularımız ləyaqətlə, mötədil davranıb və mülki vətəndaşlara zərər yetirməyib. Ermənistan tərəfində mülki əhali arasında 40 nəfərdən az tələfatın olması bunun açıq sübutudur. Bütün bunlar onu deməyə əsas verir ki, Azərbaycan müharibə meydanında da müdrik, humanist, sülhsevər mövqeyini ortaya qoyub.
Bölmənin digər xəbərləri
