Deputat: Azərbaycan Ordusu düşmənin hər bir təxribatının qarşısını almağa hazırdır
Bakı, 13 iyul, AZƏRTAC
Ötən gün Ermənistan silahlı qüvvələri Tovuz istiqamətindəki mövqelərimizi ələ keçirmək məqsədilə artilleriya atəşlərindən istifadə edərək hücuma keçməyə cəhd ediblər. Törədilmiş erməni təxribatı Azərbaycan Ordusu tərəfindən layiqincə cavablandırılıb. Döyüş nəticəsində ordumuzun 4 hərbi qulluqçusu həlak olub, 4 nəfər isə yaralanıb. Hazırda dünyanın pandemiya ilə mübarizə apardığı, bu istiqamətdə birgə fəaliyyətlərin görüldüyü bu çətin zamanda Ermənistan dövləti öz çirkin siyasətini bir daha açıq-aşkar dünyaya göstərdi. Təbii ki, bu təxribatçı əməl təcavüzkar Ermənistan rəhbərliyinin son dövrlər bölgədə gərginliyin artmasına xidmət edən fəaliyyət və səsləndirdikləri çaşdırıcı bəyanatlarının davamı kimi qiymətləndirilməlidir.
Bu fikri AZƏRTAC-a açıqlamasında Milli Məclisin Ailə, qadın və uşaq məsələləri komitəsinin sədri, professor Hicran Hüseynova bildirib.
Deputat qeyd edib ki, ötən həftə Azərbaycan Respublikasının Prezidenti, Silahlı Qüvvələrin Ali Baş Komandanı İlham Əliyev ölkədə yerli televiziyalara verdiyi müsahibə zamanı bir daha Qarabağ məsələsinə və bəzi məqamlara toxundu. Azərbaycan dövlətinin növbəti təşəbbüsü BMT Baş Assambleyasının xüsusi sessiyasının keçirilməsi ilə əlaqədar oldu. Bu təşəbbüs dünya miqyasında yüksək qiymət və dəstək aldı. 130-dan çox ölkə Azərbaycanın bu təşəbbüsünü alqışladı. Xüsusi sessiyanın keçirilməsi təşəbbüsünün əleyhinə səs verən yeganə ölkə Ermənistan oldu. Bəs yaxşı, bu, nə ilə əlaqədardır? Təbii ki, burada Azərbaycana qarşı nifrət, həmçinin Ermənistanın özünü dünyada təcrid etməsi açıq şəkildə görünür. Ölkə başçısının qeyd etdiyi kimi, “bunun əsas səbəbi Ermənistanda hökm sürən və dövlət tərəfindən təbliğ edilən Azərbaycanafobiyadır, Azərbaycan dövlətinə, Azərbaycan xalqına nifrətin təzahürüdür”.
Digər tərəfdən, koronavirusla mübarizədə birgə fəaliyyətə həsr edilməsi nəzərdə tutulan BMT-nin xüsusi sessiyasının əleyhinə çıxmaqla Ermənistan özü-özünü pis vəziyyətə saldı, dövlətin əsl mahiyyətini və mövqeyini göstərdi. Beləcə də dünya onların əsl simasını gördü.
Burada təbii ki, Ermənistan dünya ictimaiyyətinin bir daha Ermənistan-Azərbaycan Dağlıq Qarabağ münaqişəsinə öz diqqətini artıracağını gördü və beləcə etiraz etdi və yenidən təcrid edilmiş vəziyyətdə qaldı.
Ermənistanın istəyi münaqişənin nəticələrini aradan qaldırmaq, ordusunu işğal edilmiş ərazilərdən çıxarmaq deyil, gərginliyi artırmaq, yeni mövqelər ələ keçirmək, ümumilikdə danışıqlar prosesinə tamamilə mane olmaqdır və bu məqsədini açıq şəkildə nümayiş etdirir.
Ali Baş Komandan bir daha qeyd etdi ki, “Dağlıq Qarabağ münaqişəsində mövqeyimizdə hər hansı bir dəyişiklik yoxdur, ola da bilməz. Çünki bizim mövqeyimiz haqq-ədalət mövqeyidir. Bizim mövqeyimiz tarixi ədalətə, beynəlxalq hüquqa əsaslanır”.
Ermənistan isə işğal edilmiş torpaqlardan geri çəkilmək istəmir, Minsk qrupuna həmsədrlik edən ölkələrin dövlət başçılarının çoxsaylı bəyanatları Ermənistana heç bir təsir göstərmir. Ermənistan bütün beynəlxalq normaları pozur, BMT Təhlükəsizlik Şurasının qətnamələrinə məhəl qoymur, digər təşkilatların qərar və qətnamələrini saymır.
ATƏT-in Minsk qrupu bu məsələyə dair ciddi mövqeyini ortaya qoymalıdır. Prezident İlham Əliyev qeyd etdiyi kimi, Minsk qrupu sanki fəaliyyətdə olmasını göstərir və biz “danışıqları imitasiya üçün aparası deyilik. Biz danışıqları mahiyyət üzrə aparmaq istəyirik”.
Ermənistanın baş naziri “Qarabağ Ermənistandır” deyəndə Azərbaycan buna layiqincə cavab verdi. Nikol Paşinyanın bu ifadəsi Minsk qrupunun vasitəçiliyi ilə davam edən danışıqların mahiyyətini alt-üst edir, danışıqları faktiki olaraq əhəmiyyətsiz edir. Minsk qrupu buna adekvat cavab vermədi.
Ermənistan dünən törətdiyi təxribatçı əməlləri ilə üçüncü ölkələri Ermənistan-Azərbaycan münaqişəsinə cəlb etməyə çalışır. Ancaq artıq dünya birliyi Ermənistanın bu çirkin, bölücü və təcavüzkar siyasətini tanıyır və bilir.
Güclü Azərbaycan Ordusu düşmənin hər bir təxribatının qarşısını almağa hazırdır və düşmən hər bir təxribatında layiqli cavabını alacaq.
Ermənistan bu təxribatların törədilməsinə görə məsuliyyət daşıyır.
Ermənistan silahlı qüvvələrinin təxribatı nəticəsində həlak olan şəhidlərimizin ailələrinə və yaxınlarına dərin hüznlə başsağlığı verir və yaralanan qazilərimizin isə tezliklə şəfa tapmasını diləyirik.
Bölmənin digər xəbərləri
