Deputat: Azərbaycan-Türkiyə-Pakistan dostluğu beynəlxalq səviyyədə geosiyasi gücün təzahürüdür
Bakı, 1 iyun, AZƏRTAC
28 May - Müstəqillik Günündə Laçında tarixi an yaşandı. Xalqımız üçün olduqca əlamətdar bu gündə Azərbaycan Respublikasının Prezidenti İlham Əliyevin, Türkiyə Respublikasının Prezidenti Rəcəb Tayyib Ərdoğanın və Pakistan İslam Respublikasının Baş naziri Məhəmməd Şahbaz Şərifin iştirakı ilə Zirvə görüşü keçirildi və üçtərəfli münasibətlərdə yeni səhifə açıldı. Hər üç ölkənin lideri görüşdə dünya və regional proseslərlə bağlı vacib mesajlar verdi. Onlar ölkələr arasında dostluq və əməkdaşlığın əhəmiyyətini, regiona verdiyi töhfələri xüsusi vurğuladılar.
Bu fikirləri AZƏRTAC-a açıqlamasında Milli Məclisin deputatı Tamam Cəfərova deyib.
Deputat bildirib ki, Azərbaycan, Türkiyə və Pakistan beynəlxalq münasibətlər sistemində öz sözünü deyən güclü dövlətlərdir. Hər üç ölkə arasında dərin dostluq və qardaşlıq əlaqələri mövcuddur. Bu münasibətlərin əsasında ortaq tarixi, dini və mədəni dəyərlər dayanır. Tarixi köklərə əsaslanan əlaqələr zamanla güclənərək müasir dövrdə strateji tərəfdaşlıq səviyyəsinə yüksəlib. Prezident İlham Əliyev Zirvə görüşündə xüsusi vurğulayıb ki, üç qardaş ölkənin əməkdaşlığı ildən-ilə güclənir və daim bir-birinin yanında dayanır.
“Qeyd etmək lazımdır ki, ölkələrimiz arasındakı dostluq, qardaşlıq və strateji tərəfdaşlıq beynəlxalq münasibətlər sistemində nümunəvi əməkdaşlıq modeli kimi dəyərləndirilməlidir. Laçında keçirilən üçtərəfli görüşdə liderlərin verdiyi mesajlar bunu bir daha təsdiqlədi. Görüşdə Azərbaycan, Türkiyə və Pakistanın gələcəkdə qarşılıqlı əməkdaşlığın bütün sahələrində - siyasət, iqtisadiyyat, investisiya və müdafiədə əlaqələrin daha da inkişaf etdirilməsi prioritet kimi vurğulandı”, - deyə Tamam Cəfərova bildirib.
Deputat 44 günlük Vətən müharibəsi zamanı Türkiyə və Pakistanın Azərbaycana verdiyi siyasi və mənəvi dəstəyi xatırladaraq vurğulayıb ki, Azərbaycan Ali Baş Komandanın rəhbərliyi ilə möhtəşəm qələbə qazanaraq ərazi bütövlüyünü bərpa etdi və tarix yazdı. Bu zəfərin əsas amillərindən biri dost və qardaş dövlətlərin ölkəmizə verdiyi mənəvi-siyasi dəstək oldu. Dövlətimizin başçısı çıxışında dost və qardaş ölkələrin dəstəyini xüsusi qeyd edərək deyib: “30 il ərzində işğal altında qalan Laçın şəhərində birgə olmağımız böyük rəmzi məna daşıyır. Çünki 44 günlük İkinci Qarabağ müharibəsi zamanı Türkiyə və Pakistan bizi dəstəklədi. Bu dəstək bizi ruhlandırır, əlavə güc verirdi. Bu böyük siyasi və mənəvi dəstəyə görə hər zaman qardaş ölkələrin rəhbərlərinə və xalqlarına minnətdarıq”.
Tamam Cəfərova üç qardaş ölkə arasında əməkdaşlıqda yeni səhifənin açıldığını qeyd edib: “Bu gün əminliklə deyə bilərik ki, Azərbaycan-Türkiyə-Pakistan dostluğu və qardaşlığı beynəlxalq səviyyədə geosiyasi gücün təzahürüdür. Ötən il Astanada keçirilən görüşdən sonra Laçında keçirilən ikinci Zirvə görüşü dərin rəmzi məna daşımaqla yanaşı, ölkələrimiz arasında qarşılıqlı siyasi dəstəyin açıq ifadəsidir. Liderlərin Laçında Müstəqillik Gününə həsr olunan tədbirdə birgə iştirakı da qardaşlığımızın növbəti təzahürüdür. Əminik ki, azad edilmiş Laçından verilən mesajlardan dərs çıxaranlar olacaq. Dost və düşmənlər bu sözləri düzgün analiz etməli və gələcək planlarında nəzərə almalıdırlar”.
Bölmənin digər xəbərləri
