Deputat: Makronun açıqlaması hüququn aliliyi, sülh və ədalət prinsipləri ilə üst-üstə düşmür
Bakı, 2 oktyabr, AZƏRTAC
Fransa Prezidenti Emmanuel Makronun açıqlaması böyük təəssüf hissi yaradır.
AZƏRTAC xəbər verir ki, bu sözləri Milli Məclisin deputatı Nurlan Həsənov Fransa Prezidentinin son günlər Ermənistanın Azərbaycana qarşı törətdiyi hərbi təxribatlarla bağlı fikirlərini şərh edərkən deyib.
Deputat bildirib ki, ortada BMT Təhlükəsizlik Şurasının bəyannamələri, hamılıqla tanınan beynəlxalq hüququn norma və prinsipləri var. Həmin hüquqi sənədlər isə Dağlıq Qarabağın Azərbaycanın ayrılmaz tərkib hissəsi olduğunu və Ermənistanın işğalçı dövlət olduğunu göstərir. O vaxt Fransa bu bəyannamələrin qəbul edilməsinə hətta dəstəyini bildirib. İndi nə dəyişib? Belə çıxır ki, Makron BMT Təhlükəsizlik Şurasının qətnamələrini, yəni BMT Təhlükəsizlik Şurasını artıq heçə sayır. Bu, Fransanın Minsk qrupunda həmsədr kimi obyektivliyini ciddi və açıq şəkildə sual altına salır.
Deputat bildirib ki, münaqişənin indiyədək sülh yolu ilə həll edilə bilməməsinin səbəblərindən biri də elə məhz bu kimi qeyri-obyektiv yanaşmalar olub: “Minsk qrupu indiyədək öz fəaliyyətini beynəlxalq hüquq normaları, hüququn aliliyi prinsipi ilə təşkil edə bilsəydi, münaqişə çoxdan həll olunar, regionda sülh bərqərar olardı. Beynəlxalq hüququ heçə sayan bir qurumdan obyektiv şəkildə sülhü təmin etməsini gözləmək nə dərəcə doğru olar? Minsk qrupu həmsədr ölkənin prezidenti nə üçün separatizmi dəstəkləyir?".
Nurlan Həsənov deyib ki, Makronun bu açıqlaması elə Avropa dəyərlərinə də ziddir, hüququn aliliyinə, sülh və ədalət prinsipləri ilə üst-üstə düşmür. Azərbaycan hər zaman sülh arzusunda olub, müharibəni, etnik qarşıdurmanı pisləyib. Azərbaycan, sadəcə, öz ərazi bütövlüyünü bərpa etmək istəyir. "Çətin zamanlarda kim dost, kim düşməndir daha yaxşı ayıra bilirik. Bu baxımdan qardaş Türkiyənin Azərbaycanın haqq mübarizəsində birmənalı, qarşılıqsız dəstəyini Azərbaycan xalqı heç vaxt unutmayacaq", - deyə deputat bildirib.
Bölmənin digər xəbərləri
