SİYASƏT
Deputat: Prezident İlham Əliyev Şuşadan müəyyən dairələrə sərt xəbərdarlıq etdi
![Deputat: Prezident İlham Əliyev Şuşadan müəyyən dairələrə sərt xəbərdarlıq etdi](/files/2022/3/1200x630/16680804991778628488_1200x630.jpg)
Bakı, 10 noyabr, AZƏRTAC
Zəfər Günü münasibətilə Şuşada təşkil olunan tədbirdə çıxış edən Prezident İlham Əliyev iki il bundan əvvəl xalqımızın möhtəşəm qələbəsi ilə başa çatan Vətən müharibəsini geniş təhlil edərək, Azərbaycan həqiqətlərini bir daha beynəlxalq ictimaiyyətin diqqətinə çatdırdı. Dövlətimizin başçısı, həmçinin müəyyən dairələrə sərt xəbərdarlıq etdi.
Bunu AZƏRTAC-a açıqlamasında Milli Məclisin deputatı Cavid Osmanov deyib.
Alınmaz qala sayılan Şuşanı iki il bundan əvvəl erməni işğalından azad etməklə Azərbaycan Silahlı Qüvvələrinin şanlı tarix yazdığını qeyd edən Prezident İlham Əliyev əsgər və zabitlərinin şücaətini yüksək qiymətləndirdi. Vətən müharibəsində insanlarımızın həmrəy və çox əzmkar olduqlarını vurğulayan Müzəffər Ali Baş Komandan Azərbaycan Ordusunda bir nəfər də olsun fərari olmadığını qeyd edib. Halbuki Ermənistan ordusunda döyüşdən yayınanların sayı on mindən çox olub.
“İşğal dövründə Ermənistanın rəsmi təbliğatı, onların havadarlarının media resursları bir fikri bütün dünyaya çatdırmağa çalışırdı ki, Azərbaycan öz ərazi bütövlüyünü heç vaxt müharibə yolu ilə bərpa edə bilməz. Lakin Azərbaycan xalqı bir yumruq kimi birləşərək tarixi missiyasını yerinə yetirdi. Müharibəyə gedən yolun bir çox istiqamətlərdən keçdiyini bildirən Prezident İlham Əliyev güclü iqtisadiyyatın olmasını ən əsas şərt kimi qeyd etdi. Bu gün dünyada baş verən iqtisadi proseslər, çətinliklər, böhranlar da onu göstərir ki, Azərbaycan iqtisadiyyatı dayanıqlıdır. Ağır müharibədən çıxmış ölkəmiz işğaldan azad edilmiş torpaqlarda iki il ərzində genişmiqyaslı quruculuq işləri aparması bunun sübutudur.
Dövlətimizin apardığı uğurlu xarici siyasət nəticəsində ölkəmiz çoxlu dostlar qazanmış, eyni zamanda, Qarabağ həqiqətləri, erməni işğalı ilə bağlı həqiqətlər dünya birliyinə çatdırılıb. Vətən müharibəsinə qədər olan dövrdə BMT, ATƏT, Avropa İttifaqı, Qoşulmama Hərəkatı, İslam Əməkdaşlıq Təşkilatı, Avropa Şurası kimi aparıcı beynəlxalq təşkilatlar ölkəmizin mövqeyini dəstəkləyən, yəni, haqq-ədaləti ifadə edən qərar və qətnamələr qəbul ediblər. Bütün bunlar haqq işi uğrunda qələbəmiz üçün beynəlxalq hüquqi zəmin hazırlayıb. Prezident İlham Əliyev bəzi ermənipərəst və Ermənistanla yaxın əlaqələrdə olan ölkələrin Azərbaycana qarşı bəzi siyasi addımlarının heç bir nəticə vermədiyini diqqətə çatdırdı”, - deyə C.Osmanov bildirib.
Deputatın qeyd edib ki, Azərbaycanın regionda və dünyada əsas söz sahiblərindən olduğuna diqqət çəkən dövlətimizin başçısı Azərbaycanın təşəbbüsü ilə icra edilən layihələrin həm özümüzə, həm də tərəfdaşlarımıza böyük həcmdə fayda gətirdiyini vurğuladı. Hazırda nəqliyyat və enerji layihələrində iştirak edən ölkələrin sayı artıq onlarladır. Məhz bu layihələr ölkəmizə əlavə maliyyə imkanı yaratdı və bu maliyyə imkanları hərbi potensialın gücləndirilməsinə yönəldildi.
“Müzəffər Ali Baş Komandan, Prezident İlham Əliyev Şuşadan verdiyi mesajla bildirdi ki, İkinci Qarabağ müharibəsinin dərsləri Ermənistan tərəfindən unudulmamalıdır. Odla oynamağın qarşı tərəfə baha başa gələcəyini qeyd edən dövlətimizin başçısı, onların “Fərrux” və “Qisas” əməliyyatlarının, sərhəddə baş verən 13-14 sentyabr hadisələrindən dərs çıxarmalarını diqqətə çatdırdı. Azərbaycan Prezidenti bildirdi ki, biz heç kimdən qorxmuruq, heç kimdən çəkinmirik. Erməni xalqı obyektiv həqiqəti anlamalıdır ki, növbəti dəfə xaricdə oturan və bu bölgəyə bir oyun meydançası kimi baxmaq istəyənlərin qurbanına çevrilə bilərlər. Ermənistan tərəfi Azərbaycanın irəli sürdüyü, beynəlxalq hüquqa əsaslan şərtləri qəbul etməli və bu şərtlər əsasında sülh müqaviləsinin imzalanmasına çalışmalıdır”, - deyə Cavid Osmanov fikirlərini yekunlaşdırıb.