SİYASƏT
Deputat: Prezident İlham Əliyevin Brüssel səfəri Avropa İttifaqının Cənubi Qafqaza yönəlik siyasətini dəyişəcək
![Deputat: Prezident İlham Əliyevin Brüssel səfəri Avropa İttifaqının Cənubi Qafqaza yönəlik siyasətini dəyişəcək](/files/2021/3/1200x630/16402480393541318411_1200x630.jpg)
Bakı, 23 dekabr, AZƏRTAC
Prezident İlham Əliyevin Brüsseldə Avropa İttifaqı Şurasının Prezidenti Şarl Mişel və NATO-nun Baş Katibi Yens Stoltenberqlə keçirdiyi görüşlərdən sonra hər iki nüfuzlu beynəlxalq təşkilatın rəhbərlərinin verdiyi bəyanatlar İkinci Qarabağ savaşının nəticələri, həmçinin Azərbaycanın milli maraqları ilə üst-üstə düşür. Qeyd olunan görüşlərdən sonra mətbuata verilən bəyanatların heç birində ermənilərin ciddi-cəhdlə təşviq etdiyi tezislərə yer verilmədi. Diqqəti çəkən məqamlardan birincisi budur ki, Şarl Mişel verdiyi açıqlamada indiyədək imzalanan üçtərəfli sənədlərin icrasının vacibliyini qeyd etdi və ilk dəfə olaraq bu bəyanatlara kompleks yanaşma sərgilədi. Bu isə o deməkdir ki, Ermənistanın hər hansı ad altında əldə olunan razılaşmaları pozmaq və ya özünə sərf edən tərəfi vasitəçi kimi regiona cəlb etmək cəhdi Brüssel tərəfindən dəstəklənmir.
Bu sözləri AZƏRTAC-açıqlamasında Milli Məclisin deputatı Azay Quliyev deyib.
Deputat bildirib ki, Şarl Mişel ermənilərin arzusunun əksinə olaraq "Dağlıq Qarabağ münaqişəsi" sözünü işlətmədi, həmçinin Ermənistan-Azərbaycan arasında münasibətlərin normallaşması prosesində ATƏT-in Minsk qrupuna istinad etmədi: “Tam əksinə ölkəmizin irəli sürdüyü Azərbaycan və Ermənistan arasında əhatəli sülh sazişinin imzalanmasının vacibliyini vurğuladı. Bu isə Aİ-nin regionda yeni yaranmış reallığı qəbul etdiyini, Azərbaycanın bu məsələdə sərgilədiyi qətiyyətli mövqeyinə və prinsipial siyasətinə hörmətlə yanaşdığını göstərir. Bu, həm də ermənipərəst Fransanın müəyyən mənada neytrallaşdırılması deməkdir. Baxmayaraq ki, Fransa prezidenti Makron gələn ilin aprelində keçiriləcək prezident seçkilərində xal qazanmaq üçün Prezident İlham Əliyevdən görüş xahiş etmişdi və dövlətimizin başçısı da nəzakət xatirinə buna etiraz etməmişdi”.
“Prezident İlham Əliyev ilk dəfə Brüsseldə Zəngəzur dəhlizi ilə bağlı ölkəmizin konkret və açıq mövqeyini ortaya qoyaraq bildirdi ki, Zəngəzur və Laçın dəhlizinə eyni status verilməlidir. Ya hər ikisində gömrük və ya sərhəd yoxlaması olmadan keçid imkanı tanınmalı, ya da əgər Zəngəzur dəhlizinə bu yoxlamalar tətbiq ediləcəksə, o zaman eyni hüquqi prosedurlar Laçın dəhlizinə də tətbiq edilməlidir. Bunun nə demək olduğunu biz hamımız çox yaxşı başa düşürük. Bu, Azərbaycanın 100 il bundan əvvəl qoparılmış qərbi Zəngəzur torpaqlarına maneəsiz keçid əldə etməsi, ya da Laçın dəhlizindəki sərbəst buraxılış rejiminə son qoyulması üçün tarixi fürsətdir. Bütün bunların fonunda Türkiyənin Ermənistanla münasibətləri normallaşdırmaq üçün təcrübəli diplomatını, ABŞ-dakı keçmiş səfiri Sərdar Kılıcı xüsusi nümayəndə təyin etməsi və normallaşdırma prosesinin Azərbaycanla razılaşdırılması haqqında verdiyi bəyanat Cənubi Qafqazda yeni təşəbbüslərə start verildiyindən xəbər verir. Son günlər yaşanan bütün bu hadisələr Azərbaycanın maraqları və ssenarisi əsasında baş verir və inanırıq ki, yaxın gələcəkdə biz bunun konkret nəticələrini görə biləcəyik”, - deyə Azay Quliyev əlavə edib.