Deputat: Qarabağ Azərbaycanın beynəlxalq hüquq çərçivəsində tanınmış əzəli torpaqlarıdır
Bakı, 4 oktyabr, AZƏRTAC
Ermənistanın Azərbaycana qarşı təcavüzkar siyasəti uzun illər boyu davam etməkdədir. Ermənistan-Azərbaycan Dağlıq Qarabağ münaqişəsi ötən əsrin 90-cı illərin əvvəllərindən başlamış və artıq beynəlxalq xarakterli problemə çevrilmişdir. 1993-cü ildə münaqişəni nizama salmaq üçün BMT Təhlükəsizlik Şurasının münaqişəyə dair qəbul etdiyi 4 qətnaməyə Ermənistan tərəfi bu günə kimi əməl etməmişdir.
Bu fikirləri AZƏRTAC-a Milli Məclisin deputatı Ülviyyə Ağayeva deyib.
Deputat bildirib ki, Azərbaycanın haqlı mübarizəsinə qərəzli mövqe nümayiş etdirən Fransa və digər dövlətlər son illər münaqişənin sülh yolu ilə həll edilməsi üçün müzakirələrin davam etmədiyini yaxşı bilirdilər. Hətta Azərbaycan Prezidenti İlham Əliyev həmsədr ölkələrin diqqətinə çatdırmışdı ki, Paşinyan hökuməti danışıqlardan boyun qaçırır. Yaranmış indiki vəziyyət həmsədr ölkələrin münaqişənin sülh yolu ilə həll olunması prosesinə etinasız yanaşmasının nəticəsidir.
Uzun illər boyu problemin sülh yolu ilə həllinə çalışan Azərbaycan hökuməti və Azərbaycan xalqının artıq səbir kasası daşmışdır. Sentyabrın 27-də Ermənistan tərəfinin atəşkəsi pozması ilə Dağlıq Qarabağ münaqişəsi pik həddə çatdı. Azərbaycan Ordusu düşmənə tutarlı cavab verərək əzəli torpaqlarımızın işğaldan azad olunması uğrunda əks-hücuma keçdi. Azərbaycanın haqq işi uğrunda mübarizəsini açıq şəkildə dəstəkləyən, hər zaman yanında olduğunu vurğulayan qardaş dövlətlər var. Türkiyə, Pakistan bu yolda daha dönməz mövqe tutmuşdur.
Ancaq bir sıra Qərb dövlətləri bu məsələdə siyasi diplomatiyaya əməl etmədən birtərəflilik göstərmir və bilərəkdən ağı qara yazır, işğalçı dövlətlə öz torpaqlarında Vətən müharibəsi aparan Azərbaycanı sülhə, barışığa çağırır, əslində isə tərəfsizliyini nümayiş etdirmək əvəzinə, işğalçı Ermənistanı dəstəkləyir.
Sentyabrın 30-da Fransa Prezidenti Emmanuel Makron birtərəfli və qərəzli mövqe nümayiş etdirərək Ermənistan və erməniləri dəstəklədiyini açıq-aydın bəyan etmişdir. Onsuz da bütün bu illər ərzində Minsk Qrupu qərəzli, səlahiyyətsiz iş prinsipi və mövqeyi nümayiş etdirmişdir. Emmanuel Makronun Ermənistan-Azərbaycan münaqişəsi ilə bağlı baş verən son hadisələrlə bağlı bəyanatı münaqişənin həll edilməsi üçün yaradılan Minsk Qrupu həmsədri kimi ölkənin vasitəçilik missiyası ilə uyğun gəlmir. Bu bəyanat bölgə və beynəlxalq təhlükəsizliyin təmin edilməsinə xidmət etmir, əksinə, işğalçıya dəstəkdir və Fransa özünün işğalçının yanında olduğunu etiraf edir.
Halbuki otuz il ərzində torpaqlarına həsrət qalmış Azərbaycan işğalçıya qarşı Vətən müharibəsi aparır və Azərbaycan Ermənistanın işğal etdiyi torpaqlarını azad etmək üçün bütün hallarda beynəlxalq hüquqa əsaslanır, bu, onun haqq işidir. Fransa, ABŞ, Rusiya kimi dövlətlər və bir sıra beynəlxalq qurumlar Ermənistan-Azərbaycan münaqişəsi ilə bağlı danışıqların bərpasına dair çağırışlar edirdilər. Son iki ildə Azərbaycan Prezidenti İlham Əliyev bu ölkələrin diqqətinə çatdırırdı ki, Paşinyan hökuməti danışıqlardan imtina edir. Nəticə isə göz qabağındadır. Ermənistan hökumətinin işğalçı siyasətinə qarşı Azərbaycan ordusu öz torpaqları uğrunda son damla qanına kimi vuruşmağa hazırdır, elə buna görə də bütün Azərbaycan müharibənin başlanmasına sevinir, çünki haqlı olduğunu bilir.
Artıq neçə gündür ki, Azərbaycan Ordusu düşmənə öz gücünü, qüdrətini göstərərək, müqəddəs torpaqlarımız, Vətənimiz və xalqımız uğrunda mübarizəni davam etdirir. Bu gün bütün dünya ictimaiyyəti, mənəm-mənəm deyən dövlətlər, öz maraqlarını “məzlum” erməni xalqının haqqını müdafiə etmək adı altında pərdələyən siyasətçilər başa düşməli və belə bir tarixi faktla barışmalıdırlar: Qarabağ mübahisəli torpaqlar deyil, Azərbaycanın beynəlxalq hüquq çərçivəsində tanınmış əzəli torpaqları, Azərbaycanın özüdür.
Azərbaycan Ordusunun qarşısında tab gətirə bilməyən ermənilər hərbi maşınlarını, silah-sursatlarını, hətta bayraqlarını da döyüş meydanında qoyub qaçırlar. Bu gün bütün qabaqcıl və güclü dövlətlərin diqqəti Azərbaycanda gedən azadlıq mübarizəsinə yönəlmişdir, ancaq təəssüf ki, bizim qələbələrimiz onların çoxlarının ürəyincə deyil. Haqq işi uğrunda mübarizəyə qalxmış Azərbaycan öz əzmini dəyişmək fikrində deyil. Azərbaycan Respublikasının Prezidenti İlham Əliyevin “Əl-Cəzairə” televiziya kanalına verdiyi müsahibə onun öz siyasətində və bugünkü mövqeyində dönməz olduğunu bir daha nümayiş etdirir. Bizi döyüşləri dayandırmağa, yenidən mənasız sülh danışıqlarına cəlb etməyə çalışan dövlətlərə üz tutaraq bildirmişdir ki, qoy Paşinyan etiraf etsin ki, Qarabağ Azərbaycandır. Bundan sonra bizim şərtlərimizlə döyüşləri dayandırmaq mümkündür. Dövlət rəhbərinin belə dönməz mövqeyi döyüşçülərimizin də əzmini artırır. Oktyabrın 3-də axşam saatlarında Prezidentimiz Ordumuzun daha bir qələbəsini elan etdi: Madagiz azad edildi. Bayrağımız Madagizdə dalğalanır və onun tarixi adı bərpa edildi: Suqovuşan. Bu gün Azərbaycan Ordusu Cəbrayıl şəhərini və rayonunun bir neçə kəndini işğaldan azad etmişdir. Azərbaycanın işi haqq işidir. O, Vətən müharibəsi aparır. Bundan müqəddəs və ədalətli iş ola bilərmi?!
Bölmənin digər xəbərləri
