Bakı, 5 avqust, AZƏRTAC

Reallıq ondan ibarətdir ki, Ermənistan heç vaxt mahiyyətini dəyişməyəcək. 2020-ci ilin yayında artıq dövlət sərhədi boyunca intensiv hərbi təxribatlar törədən Ermənistan aydın nümayiş etdirdi ki, o, münaqişənin dinc vasitələrlə tənzimlənməsində maraqlı deyil, əksinə, işğalçılıq siyasətini davam etdirməkdə israrlıdır. Azərbaycan tərəfi münaqişənin dinc yollarla aradan qaldırılması üçün səylər göstərməklə yanaşı bəyan edirdi ki, nəticəsiz danışıqları sonsuzluğa qədər davam etdirməyəcək.

AZƏRTAC xəbər verir ki, bunu Milli Məclisin deputatı, YAP İdarə Heyətinin üzvü, siyasi elmlər doktoru Elşad Mirbəşiroğlu söyləyib.

Deputatın sözlərinə görə, Prezident İlham Əliyev hər zaman səsləndirirdi ki, danışıqlar nəticə verməsə, biz hərbi yolla torpaqlarımızı işğaldan azad edəcəyik. Ermənilər öz təxribatları ilə nümayiş etdirdilər ki, danışıqlar, sadəcə, görüntü xarakterlidir. Belə olan halda, 2020-ci ilin sentyabrında Ermənistanın növbəti təxribatlarının qarşısını almaqla yanaşı, ölkəmiz əks-hücum əməliyyatlarına başlayaraq qısa zamanda torpaqlarımızı işğaldan azad etdi və Ermənistanı kapitulyasiya sənədini imzalamağa məcbur etdi. Bununla, biz həm siyasi, həm də hərbi müstəvidə inamlı Qələbə qazanmış olduq.

“Vətən müharibəsindən sonra da proseslər başqa formatda sanki təkrarlanmaqda idi. Belə ki, 2020-ci il 10 noyabr tarixində imzalanmış birgə Bəyanatın dördüncü maddəsinə uyğun olaraq, erməni silahlı birləşmələri Azərbaycan ərazilərindən çıxmalı idilər. Bəyanatın digər maddələrinə münasibətdə olduğu kimi, Ermənistan tərəfi bu maddəyə laqeyd yanaşdı. Daha doğrusu, Ermənistan tərəfi növbəti dəfə nümayiş etdirdi ki, o, öz imzasına hörmət etmir. Bu da aydın göstərirdi ki, Ermənistan yekun sülh sazişinin imzalanmasından hər vasitə ilə yayınacaq. Onun bu günə qədər davranışları da məhz bunu sübut etdi”, - deyə E.Mirbəşiroğlu qeyd edib.

Deputat diqqətə çatdırıb ki, Birgə Bəyanatın şərtlərinə əməl etməyən Ermənistan bütövlükdə regional sülhə və təhlükəsizliyə real təhdid yaratmaqda davam edir. Azərbaycan Prezidenti Ermənistana dəfələrlə sərt xəbərdarlıq edərək, qanunsuz silahlı dəstəsinin Azərbaycanın ərazisindən çıxarılmasını tələb edib. Prezident sonuncu dəfə bildirdi ki, birgə bəyanatın da tələbinə uyğun olaraq, qanunsuz erməni silahlı dəstələri Azərbaycan ərazilərindən çıxarılmazsa, və təxribatlar davam edərsə, onda Azərbaycan müvafiq formada öz təhlükəsizliyini təmin etmək üçün addımlar atacaq. Lakin Ermənistan əvvəlki təcavüzkar, təxribatçı və işğalçılıq mövqeyində qaldı. Son dövrlərdə Azərbaycanın Qarabağ ərazisindəki qanunsuz erməni silahlı dəstələri intensiv olaraq Azərbaycan Ordusunun hərbi hissələrinə qarşı təxribatlar, terrorlar törədirdilər. Avqustun 3-də Laçın rayonu istiqamətində Azərbaycan Ordu bölmələrinin mövqelərinin erməni separatçıları tərəfindən intensiv atəşə tutulması nəticəsində müddətli hərbi xidmətdə olan əsgər Anar Kazımov şəhid oldu. Bununla da ermənilər Azərbaycan tərəfinə sərt antiterror tədbirləri həyata keçirməkdən başqa yol qoymadılar.

“Qisas əməliyyatı çərçivəsində düşmən sözün əsl mənasında növbəti ölümcül zərbə aldı. Bu ölümcül zərbə həm siyasi, həm də hərbi xarakterli kimi səciyyələndirilə bilər. Belə ki, antiterror əməliyyatı nəticəsində Laçın və Kəlbəcər istiqamətində strateji yüksəklik (Sarıbaba) Ordumuzun nəzarəti altına keçdi. Bundan başqa, Kiçik Qafqaz dağ silsiləsinin Qarabağ istiqamətində davamında mühüm yüksəklikdə (Qırxqız) də mövqelərimiz təmin edildi. Bundan sonrakı mərhələdə sözsüz ki, erməni separatçılarının təxribatlar törətmək imkanları və həvəsləri əhəmiyyətli dərəcədə məhdudlaşmış olacaq. Nəzərə almaq lazımdır ki, Ermənistan tərəfi digər məsələlərdə də imitasiyalarla məşğul idilər. Belə ki, Laçın dəhlizinə alternativ yolun yaradılması məsələsi də birgə bəyanatda ifadəsini tapmışdı. Azərbaycan tərəfi bu istiqamətdə özünə aid olan bütün işləri yerinə yetirsə də, Ermənistan tərəfi süni şəkildə prosesi əngəlləməklə məşğul idi. Bildiyimiz kimi, yeni yolun açılması Laçın şəhərinə tam çıxışımızı təmin edəcək. Yəni, şəhərdə və ətraf kəndlərdə nəzarəti Azərbaycan tərəfi həyata keçirəcək”, - deyə deputat vurğulayıb.

Onun sözlərinə görə, Ermənistanın yeni dəhlizin açılmasını əngəlləməkdə məqsədi məhz bunun qarşısını almaqdan ibarət idi. Azərbaycanın həyata keçirdiyi "Qisas" antiterror əməliyyatından sonra Ermənistanda reallıq hissləri güclənəcək. Yəni, Ermənistan imza atdığı sənəddəki müddəalara uyğun davranacaq. Artıq bunun əlamətləri görünməkdədir. Yayılan məlumatlara əsasən, Laçın dəhlizinə alternativ yolun açılması istiqamətində Ermənistan tərəfi artıq addımlar atmağa başlayıb. Bundan əlavə, Ermənistan Zəngəzur dəhlizinin açılması məsələsi üzərindən müxtəlif manipulyasiyalar etməyə çalışırdı. Birgə Bəyanatda aydın ifadə olunduğu halda, Zəngəzur dəhlizi ilə bağlı hər hansı bir razılaşmanın olmadığını bildirirdi. Halbuki, Birgə Bəyanatın 9-cu maddəsində Azərbaycanın qərb rayonları ilə Naxçıvanı birləşdirəcək Zəngəzur dəhlizinin açılması məsələsi tam aydın ifadə olunub. Yenə də Azərbaycan tərəfi öz ərazisində bu dəhlizin açılması üçün bütün infrastruktur elementlərini yaradıb. Ermənistan tərəfi isə, digər məsələlərdə olduğu kimi, bu məsələdə də yalnızca manipulyasiyalarla məşğul idi. Qisas əməliyyatı hesab edirəm ki, bu məsələdə də Ermənistanı realist davranmağa məcbur edəcək. Artıq bunun da baş verdiyini görməkdəyik. Belə ki, avqustun 4-də Ermənistan baş naziri N. Paşinyan nazirlər kabinetinin iclasında bildirdi ki, ölkəsi Azərbaycanın qərb rayonları ilə Naxçıvan arasında əlaqəni təmin etməyə hazırdır. Əslində, baş verənlər Azərbaycan tərəfindən reallaşdırılan düşməni sülhə məcburetmə strategiyası adlandırıla bilər.

“Azərbaycan Prezidenti İlham Əliyev növbəti dəfə nümayiş etdirdi ki, səsləndirdiyi fikirlərdə, atdığı addımlarda tam əmindir. Belə ki, Ermənistanın hər vasitə ilə əngəlləməyə çalışdığı istər Zəngəzur, istərsə də yeni Laçın dəhlizinin yaradılması üçün Azərbaycan vaxt itirmədən lazım olan bütün işləri həyata keçirmişdi. Yəni, Azərbaycan Prezidenti əmin idi ki, Ermənistanı da analoji addımlar atmağa məcbur edəcək. Bu mənada, hesab edirəm ki, Qisas əməliyyatı taktiki baxımdan da, olduqca təsirli oldu. Bütün bunlarla, yanaşı, təbii ki, Azərbaycan tərəfi Ermənistana və ərazimizdəki erməni separatçılarına sərt əyani dərs verdi və xəbərdarlıq etdi. Azərbaycan əsgərinin qanına bais olan çox sərt cəzalandırılır. Düşünürəm ki, məhz bu məqam da ermənilərin alt şüurunda özünə möhkəm yer edəcək. Fikirlərimizi ümumiləşdirərək, qeyd edə bilərik ki, “Qisas” əməliyyatı bütün ərazilərimiz boyunca suverenliyimizin etibarlı və dönməz şəkildə təmin olunmasını şərtləndirəcək”, - deyə Elşad Mirbəşiroğlu fikirlərini yekunlaşdırıb.