Deputat: Türk Dövlətləri Təşkilatı regionun vahid güc mərkəzinə çevrilməkdədir
Bakı, 14 noyabr, AZƏRTAC
Azərbaycan Prezidenti İlham Əliyev həmişə Türk dünyasının birliyinə çalışır və türkdilli ölkələrin siyasi, iqtisadi sahələrdə əlaqələrinin möhkəmləndirilməsində müstəsna rol oynayır. 2009-cu il oktyabrın 3-də Naxçıvanda Türkdilli ölkələrin dövlət başçılarının IX Zirvə Görüşündə Türkdilli Dövlətlərin Əməkdaşlıq Şurası yaradıldı. Türkdilli dövlətlər bütün beynəlxalq təşkilatlarda hər zaman bir-birini dəstəkləyir, eyni zamanda, iqtisadi, siyasi əlaqələr durmadan genişləndirilir. Türkdilli dövlətlər tərəfindən icra edilən bütün layihələr öz töhfəsini verməkdədir. Ölkəmizin Türkiyə, Türkmənistan və Qazaxıstan ilə neft-qaz sahəsində sıx əməkdaşlığı mövcuddur. Bu əməkdaşlığın nəticəsidir ki, Xəzər dənizinin neft-qaz ehtiyatları Avropa və dünya bazarlarına çıxarılır. Bütün çətinliklərə və xarici təzyiqlərə baxmayaraq, məhz Prezident İlham Əliyevin qətiyyətli siyasəti və mahir diplomatik səyləri nəticəsində Bakı-Tbilisi-Ceyhan neft kəməri inşa edilib. Eyni zamanda, Bakı-Tbilisi-Ərzurum qaz kəmərinin istifadəyə verilməsi ilə Azərbaycanın neft-qaz resursları Avropaya nəql olunur.
AZƏRTAC xəbər verir ki, bu sözləri Milli Məclisin deputatı Kamilə Əliyeva deyib.
Kamilə Əliyeva bildirib ki, imzalanmış ikitərəfli sazişə əsasən, Qazaxıstanın neft-qaz resursları Azərbaycan vasitəsilə dünya bazarına ixrac edilir. Prezident İlham Əliyevin təşəbbüsü ilə Bakı-Tbilisi-Qars dəmir yolu layihəsinin ərsəyə gəlməsi türkdilli dövlətlər arasında əlaqələrin daha da inkişaf etdirilməsinə böyük töhfə verir. Humanitar və mədəni sahələrin inkişaf etdirilməsi üçün dövlətimizin başçısının irəli sürdüyü təkliflər üzv dövlətlər tərəfindən rəğbətlə qarşılanıb. İcra edilmiş bütün bu layihələrin məqsədi Türk dövlətlərinin bir-biri ilə daha sıx əlaqələr qurmasına yönəlib. Qürurla qeyd etmək lazımdır ki, Türkdilli Dövlətlərin Əməkdaşlıq Şurası daha da inkişaf etdirilərək və gücləndirilərək Türk Dövlətləri Təşkilatına çevrilib. Bu Təşkilatın yaradılmasında Azərbaycan dövlətinin, şəxsən Prezident İlham Əliyevin xidməti misilsizdir.
“Noyabr 11-də Özbəkistanın Səmərqənd şəhərində Türk Dövlətləri Təşkilatının IX Zirvə Görüşünün keçirilməsi tarixi hadisə oldu. Görüşdə müzakirə edilən məsələlərə, həyata keçirilən böyük layihələrə və gələcəkdə təşkilatın qarşısına qoyduğu hədəflərə nəzər saldıqda çox yaxın zamanda Türk Dövlətləri Təşkilatının beynəlxalq sistemdə nüfuzlu quruma çevriləcəyini əminliklə söyləmək olar. Təşkilata üzv dövlətlərin yerləşdiyi coğrafiyaya nəzər salsaq görərik ki, bu ölkələr Asiya ilə Avropanı birləşdirən bir ərazidə yerləşir. Türk Dövlətləri Təşkilatına üzv dövlətlərin təbii ehtiyatları çox zəngindir və bu təbii ehtiyatlar 23 dövlətin üzv olduğu Avropa İttifaqı ölkələrinin təbii ehtiyatlarından azı iki dəfə çoxdur. Bu baxımdan üzv ölkələr qarşılıqlı sərmayə yaradaraq iqtisadi əlaqələri daha sıx şəkildə qurmaq barədə razılığa gəldilər”, - deyə Milli Məclisin deputatı qeyd edib.
Onun sözlərinə görə, Zirvə Görüşündə Prezident İlham Əliyevin çıxışı və Türk Dövlətləri Təşkilatına üzv dövlətlərin güclü ölkələrə çevrilməsi, türkdilli xalqların təhlükəsizliyinin təmin edilməsi üçün irəli sürdüyü təkliflər böyük rəğbətlə qarşılandı. Bu təkliflər bir yol xəritəsi kimi də qəbul edilə bilər. Prezident İlham Əliyevin da qeyd etdiyi kimi, Türk Dövlətləri Təşkilatı artıq vahid türk ailəsinə çevrilir. Zirvə Görüşündə Türk Dövlətləri Təşkilatı regionun vahid güc mərkəzinin əsasını qoydu. 2009-cu ildə Naxçıvan Zirvə Görüşündən başlayaraq Türk Dövlətləri Təşkilatı böyük inkişaf yolu keçib. Türkdilli dövlətlər bir-birinin milli maraqlarını nəzərə alaraq bundan sonra qarşılıqlı dəstək və həmrəylik göstərəcək. Siyasi, eləcə də həyatın bütün sahələrində, o cümlədən, müdafiə və müdafiə sənayesi sahəsində də əməkdaşlıq etməklə Türkdilli ölkələr güclü dövlətlərə çevriləcəklər.
Deputat deyib ki, bu gün müstəqil türkdilli ölkələrdən kənarda milyonlarla soydaşımız yaşayır. Prezident İlham Əliyevin onların təhlükəsizliyinin, hüquqlarının, milli kimliyinin qorunmasının Təşkilatın diqqətində saxlanılmasının vacibliyi ilə bağlı fikirləri dövlət başçıları tərəfindən rəğbətlə qarşılandı.
“Ermənistan Azərbaycan torpaqlarını 30 ilə yaxın işğal altında saxlayıb. 2020-ci ildə Azərbaycan Ermənistan üzərində tarixi Qələbə qazanaraq işğala son qoyub. Qarabağ və Şərqi Zəngəzur işğaldan azad edilib. İşğal müddətində Ermənistan böyük vəhşiliklər törədib, şəhər və kəndlərimizi viran qoyub, məscidlərimizi dağıdıb, təhqir edib. Artıq Azərbaycan bu torpaqlarda quruculuq və abadlıq işlərinə başlayıb və proses sürətlə davam edir. İşğal dövründə Türk dövlətləri hər zaman Azərbaycanı dəstəkləyib, bu gün də quruculuq və abadlıq işlərində ölkəmizlə bir yerdədir. Çox sayda Türkiyə şirkəti quruculuq işlərində yaxından iştirak edir. İşğaldan azad edilmiş Füzuli rayonunda Özbəkistan dövləti tərəfindən məktəb tikiləcək, Qazaxıstan isə yaradıcılıq mərkəzi inşa edəcək. Müharibənin başa çatmasından iki il keçməsinə baxmayaraq, Ermənistan üzərinə düşən öhdəlikləri yerinə yetirmir və Zəngəzur dəhlizinin açılmasına mane olmağa çalışır. Zirvə Görüşündə qəbul edilmiş Bəyannamədə üzv dövlətlər Zəngəzur dəhlizinin açılmasının vacib olduğunu qeyd etdilər. Zəngəzur dəhlizi Orta Dəhlizin tərkib hissəsi olaraq quru yolla Asiyadan Avropaya ən qısa və iqtisadi cəhətdən ən səmərəli dəhliz hesab edilir”, - deyə K.Əliyeva vurğulayıb.
Bölmənin digər xəbərləri
