Deputat: Vətən müharibəsində Qarabağı azad etməyimizlə Xocalı soyqırımının qisasını aldığımızı deyə bilərik
Bakı, 18 fevral, AZƏRTAC
Xocalı faciəsi Avropa məkanında, Afrikada və başqa ölkələrdə baş vermiş bir sıra soyqırımlar qədər dünya gündəmini sarsıdan bir hadisə idi. Xocalı faciəsinə qədər erməni terroru soyqırımı hazırlayan bütün elementləri gerçəkləşdirmişdi. Belə ki, Bağanıs Ayrımda, Qaradağlıda, Tuğda və başqa yerlərdə də kütləvi qətliamlar törədilmişdi. 44 günlük Vətən müharibəsində azad edilmiş yerlərdə bir sıra kütləvi məzarlıqların aşkar olunması onu göstərdi ki, hələ bilinməyən xeyli erməni cinayətləri mövcuddur. Amma Xocalı faciəsini digərlərindən fərqləndirən cəhət odur ki, bu hadisələrlə bağlı süjetlər, videolar, fotolar vaxtında çəkilə bildi. Xocalı faciəsindən kadrlar tarixi faktlar kimi bu günə qədər gəlib çıxdı. Xocalı faciəsi digər soyqırımı hadisələrindən fərqli olaraq, faktoloji baxımdan sənədlərlə, faktlarla təsdiqlənən, həmçinin şahid ifadələri, yazılan memuarlarda və digər mənbələrdə yer alan istiqamətlərdə xeyli detalları bəlli olan bir hadisədir.
Bu fikirləri AZƏRTAC-a açıqlamasında Milli Məclisin deputatı Fazil Mustafa söyləyib.
Deputat qeyd edib ki, Xocalı soyqırımını ermənilər 366-cı alayın zirehli texnikasından istifadə edərək və dəstəyini alaraq törətdilər. Xocalıda 600-dən çox insan qətlə yetirildi, 1000-dən çox şəxs isə əsir götürüldü. Qeyd edək ki, vəhşicəsinə qətlə yetirilənlər arasında uşaqlar və yaşlılar üstünlük təşkil edirdi. Çox sayda insanın meşədə donaraq ölməsi bəlkə də insanlığın itdiyi, unudulduğu tarixi an idi. Bu hadisənin məsuliyyətini indiyə qədər ermənilər üzərilərindən atırlar, səhvlərini qəbul etmək istəmirlər. Halbuki ermənilər Xocalı faciəsini törətdiklərini qəbul ediblər. Digər tərəfdən isə dünya Xocalı qətliamına səssiz qalmaqda davam edir. Belə ki, hər hansı formada erməni vəhşiliyinə reaksiya verməyən UNESCO ermənipərəst qüvvələrin əlində oyuncağa çevrilmiş bir qurum kimi insanların taleyi barədə yox, erməni abidələrinin qorunması barədə düşünür. Erməni abidələrinin sıradan çıxarılmasını bəhanə edərək Qarabağa hansısa faktaraşdırıcı missiya göndərməyi qərara alır. Bu o deməkdir ki, soyqırımı təkcə ermənilərin faşizmi deyil, onu dəstəkləyən xarici ölkələrin də törətdiyi faciədir. Ermənistanın törətdiyi soyqırımları görməzdən gələn, onlara bütün sahələrdə dəstək verən təşkilatların, ölkələrin də bu terrorda payı vardır. Dünyanın 30 ildir ki, faktlara, sənədlərə əsaslanan faciəni qəbul etməməsi bunun bariz nümunəsidir. Ona görə də biz Xocalı soyqırımının üzərində durmalıyıq. Xocalı soyqırımının tanınması istiqamətində addımlarımızı davam etdirərək, intensiv hala gətirməliyik. Bu vəhşiliklə bağlı dünyanın müxtəlif parlamentlərində indiyə qədər qəbul olunan qərarların ardının gəlməsi üçün çalışmalıyıq. Beynəlxalq təşkilatlarda Ermənistanın keçmiş liderlərinin, xüsusilə də Köçəryan, Sarkisyan və Seyran Ohanyan kimi qatillərin müttəhim kürsüsündə oturmasını təmin edə biləcək tələbləri bundan sonra da daha intensiv şəkildə səsləndirməliyik. Çünki Ermənistan dövləti və onlara dəstək verən lobbilər bu istiqamətdə bizi qabaqlamağa çalışacaqdır.
“Ermənilər uydurduqları 1915-ci il saxta “erməni soyqırımı” məsələsini tirajlamaqla məşğuldurlar. Bizim isə onların qarşısına çıxaracağımız ən sübutlu, doğru fakt Xocalı soyqırımıdır. Türkiyə dövləti də bu istiqamətdə bizə dəstək verib. Bundan sonra da qardaş ölkə Azərbaycana erməni soyqırımının tanıdılması, qəbul etdirilməsi məsələsində dəstəyini gücləndirməlidir. Çünki beynəlxalq platformalarda soyqırımı iddialarının gündəmdən çıxması üçün yalançı erməni iddialarına inananların azalması vacibdir. Biz bundan sonra belə bir soyqırımın yaşanmaması üçün daha diqqətli olmalıyıq. Əlimizdə, idarəçiliyimiz altında olan bölgələrdə elə şəkildə möhkəmlənməliyik ki, ermənilər bir daha cəsarət edib Azərbaycana qarşı qətlimalar, soyqırımılar törədə bilməsinlər. Xocalıda ermənilər tərəfindən öldürülən şəxslərin Azərbaycan cəmiyyətində xatırlanması ənənə xarakteri alıb. Amma biz bu dəfə Xocalı hadisələrini bir az fərqli platformada qeyd edirik. Yəni, bu, bizim azadlıq, Qarabağ uğrunda mübarizəmizdə çəkdiyimiz iztirabların tarixidir. İndi artıq qalib dövlət kimi bu faciəni fərqli duyğularla anırıq. Həm də təsəlli alırıq ki, ermənilər tərəfindən vəhşicəsinə öldürülən insanların qisası da Ordumuz tərəfindən alındı. Düzdür, erməni vəhşiliyi nəticəsində həyatını itirən insanları qaytarmaq olmur, amma elə etməliyik ki, erməni faşizmi bir daha baş qaldırmasın. Belə olarsa, erməni soyqırımına, qətliamına məruz qalmış şəxslərin də ruhları şad olar. 44 günlük Vətən müharibəsində Qarabağı azad etməyimizlə Xocalı soyqırımının qisasını aldığımızı deyə bilərik”, - deyə deputat vurğulayıb.
Bölmənin digər xəbərləri
