Diasporla İş üzrə Dövlət Komitəsinin sədri Avstraliyada bir sıra görüşlər keçirib
Kanberra, 5 noyabr, AZƏRTAC
Diasporla İş üzrə Dövlət Komitəsinin sədri Fuad Muradov Avstraliyaya səfəri çərçivəsində Federal Parlamentin deputatı, iqlim dəyişiklikləri və energetika naziri Kris Bauen ilə görüşüb.
AZƏRTAC xəbər verir ki, görüşdə Azərbaycan və Avstraliya arasında iqtisadi-ticari əlaqələrin inkişafı müzakirə edilib. F.Muradov son illər ölkələrimiz arasında davamlı artmaqda olan ticarət dövriyyəsinin əsasını Azərbaycandan enerji daşıyıcıları və Avstraliyadan qiymətli mineralların ixracı təşkil etdiyini bildirərək, ticarət dövriyyəsində digər məhsulların çeşidlərinin artırılması üçün potensialın mövcud olduğunu vurğulayıb. Eyni zamanda Azərbaycanda, xüsusilə işğaldan azad edilmiş ərazilərdə “yaşıl enerji” və “ağıllı şəhər” konsepsiyalarının həyata keçirildiyini bildirib.
Nazir Bauen ölkələrimiz arasında əlaqələrin inkişafı istiqamətində təmasların davamlı olacağına ümid etdiyini ifadə edib.
Növbəti görüş Yeni Cənub Uels parlamentinin üzvləri Linda Volts və Pol Linçlə olub. Komitə sədri bildirib ki, Azərbaycan diasporunun fəaliyyət istiqamətlərindən biri də yerli qanunvericilik orqanlarının üzvləri ilə sıx əlaqələrin qurulmasıdır. Bu baxımdan Avstraliyadakı Azərbaycan icmasının fəaliyyəti müsbət qiymətləndirilib. Sonra Azərbaycan həqiqətləri - Qarabağ münaqişəsinin tarixi, 44 günlük Vətən müharibəsinin səbəb və nəticələri barədə ətraflı danışıb. “Biz beynəlxalq hüquq normalarına uyğun olaraq ərazi bütövlüyümüzü bərpa etməklə öz dövlət müstəqilliyimizi qoruyub saxlamağı bacardıq”, - deyə sədr vurğulayıb.
Azərbaycan dövlətinin heç bir zaman təcavüzkar siyasət yürütmədiyi, bütün dövlətlərin ərazi bütövlüyünə hörmət etdiyi, bölgədə uzunmüddətli, dayanıqlı sülhün və normallaşma prosesinin bərqərar olması naminə ciddi səylər göstərdiyi, ölkəmizdə multikultural və tolerantlıq dəyərlərinin tarixən hökm sürdüyü nəzərə çatdırılıb. Görüşdə Azərbaycan-Avstraliya parlamentlərarası dostluq qrupunun fəaliyyətinə, yaranmış mürəkkəb durumda Azərbaycanın Ukraynaya humanitar yardım göstərməsi və digər məsələlərə də toxunulub.
Azərbaycanın Avstraliyadakı müvəqqəti işlər vəkili Ramil Qurbanov həqiqətləri təhrif etmək məqsədilə erməni lobbisinin informasiya savaşında saxtakar yollara əl atdığına, Azərbaycanın işğaldan azad etdiyi ərazilərin vəziyyətinə diqqəti cəlb edib.
Linda Volts və Pol Linç ölkəmizin multikultural və tolerantlıq dəyərlərinə üstünlük verməsindən məmnun olduqlarını ifadə ediblər. Avstraliyadakı Azərbaycan icması ilə parlament üzvləri arasında sıx əməkdaşlıq əlaqələrinin qurulduğu və millət vəkillərinin mütəmadi olaraq Azərbaycan diasporunun tədbirlərində iştirak etdikləri bildirilib. Görüş xatirə hədiyyələrinin təqdim olunması ilə yekunlaşıb.
Komitə sədri Avstraliya Yəhudi İcra Şurasının Prezidenti Cilian Siqal və baş icraçı direktoru Piter Vertheim ilə də görüşüb. Fuad Muradov Azərbaycan dövlətinin milli və dini mənsubiyyətindən asılı olmayaraq, bütün vətəndaşlara bərabər şərait yaratdığını, ölkəmizdə yüz illərlə mövcud olan multikulturalizm və tolerantlıq dəyərlərinin bu gün də uğurla davam etdirildiyini, yəhudi icması nümayəndələrinin ölkəmizin ictimai-siyasi və humanitar həyatında fəal iştirak etdiyini, hazırda xaricdə yaşayan yəhudilərin doğma vətən saydıqları Azərbaycanla sıx əlaqə saxladıqlarını vurğulayıb. Buna nümunə olaraq Viktoriya Azərbaycan Mədəniyyət Assosiasiyasının tərkibində fəaliyyət göstərən yəhudi əsilli soydaşlarımızı göstərib.
Görüşdə Avstraliya Yəhudi İcması Şurasının fəaliyyəti və həyata keçirdiyi layihələr barədə məlumat verilib. Avstraliyadakı yəhudi icması ilə sıx əməkdaşlıq əlaqələrinin qurulması ətrafında fikir mübadiləsi aparılıb.
Avstraliyanın Yeni Cənub Uels ştatının Veyverli Şurasının meri xanım Paula Marselos ilə görüşdə Sidneydə, xüsusilə Veyverli Şəhər Şurasının ərazisində yaşayan Azərbaycan icmasına göstərilən dəstəyə görə minnətdarlıq ifadə edilib. Xanım Paula Marselos Şəhər Şurası ərazisində multikultural dəyərlərə verilən diqqət və şəhər ərazisində yenidənqurma işləri barədə məlumat verib. Şəhər Şurasının hər il həyata keçirdiyi multikultural festivallarda Azərbaycan icmasının öz mədəniyyət və incəsənət nümunələri ilə iştirakı barədə ilkin razılıq əldə edilib.
Daha bir görüş Sidney Texnologiya Universitetində professor və müəllim heyəti ilə olub. Komitə sədri Azərbaycan haqqında təqdimatla çıxış edib, Qarabağ həqiqətləri, tolerantlıq və multikulturalizm mühiti barədə məlumat verdikdən sonra professor və müəllim heyətinin suallarını cavablandırıb, iki ölkə arasında əməkdaşlığın perspektivlərindən söz açıb.
Görüş zamanı Universitetin lobbisində Azərbaycanın tanıtımı mövzusunda videoçarx nümayiş etdirilib və guşə yaradılıb.
Vüqar Ağayev
AZƏRTAC-ın xüsusi müxbiri
Kanberra
Bölmənin digər xəbərləri
