Dmanisidə gənclər üçün "Yay Düşərgəsi" təşkil olunub
Tbilisi, 28 avqust, AZƏRTAC
Avqustun 25-dən 28-dək Azərbaycan Respublikası Diasporla İş üzrə Dövlət Komitəsinin layihələri çərçivəsində Gürcüstanda fəaliyyət göstərən “Dmanisi Tədris Mərkəzi”nin təşkilatçılığı ilə Dmanisi rayonunun Armudlu kəndində "Yay Düşərgəsi" təşkil olunub. Düşərgədə Marneuli və Rustavi şəhərlərinin, həmçinin Laqodexi, Bolnisi, Qardabani, Saqareco, Dmanisi rayonlarında fəaliyyət göstərən mərkəzlərin müdavimləri iştirak ediblər.
AZƏRTAC xəbər verir ki, iştirakçılar Azərbaycan Prezidenti İlham Əliyevin rəhbərliyi ilə həyata keçirilən diaspor siyasəti barədə müfəssəl məlumat alıb, rayonun tarixi abidələrini, mədəniyyət ocaqlarını ziyarət edib, əyləncəli proqramlarda və intellektual oyunlarda iştirak ediblər.
Gənclər öncə Tbilisinin mərkəzindəki Heydər Əliyev Parkında Ulu Öndərin abidəsini ziyarət ediblər.
“Yay Düşərgəsi”nin açılış mərasimində “Dmanisi Tədris Mərkəzi”nin rəhbəri Kamran Xıdırov çıxış edərək düşərgənin əhəmiyyəti barədə ətraflı məlumat verib.
Komitənin məsul əməkdaşı Sabit Məmmədov Gürcüstanda yaşayan gənclərimizin inkişafının Komitənin layihələrində prioritet istiqamətlərdən biri olduğunu vurğulayıb, bu mühüm tədbirin onların milli kimliyinin gücləndirilməsi, icmalaşma prosesinin sürətləndirilməsi baxımından xüsusi əhəmiyyətini qeyd edib.
S.Məmmədov Azərbaycan-Gürcüstan dostluğunun tarixinə nəzər salaraq Ulu Öndər Heydər Əliyevin müdrik siyasəti nəticəsində müstəqillik dövründə əlaqələrimizin daha da möhkəmləndiyi və inkişaf etdiyi qeyd edib.
Bildirilib ki, Prezident İlham Əliyev tərəfindən həyata keçirilən mühüm siyasi xətt bütün konturları ilə Azərbaycanın dövlət müstəqilliyinin daha da möhkəmlənməsinə, əbədi və sarsılmaz dövlətçiliyimizin daha da qüdrətlənməsinə xidmət edir.
Ulu Öndərin şah əsəri olan güclü Azərbaycan dövlətinin 44 günlük Vətən müharibəsində qazandığı şanlı Zəfər onun öz suverenliyini, müstəqilliyini qorumaq qüdrətinin sübutu, Heydər Əliyev siyasətinin parlaq təntənəsidir.
“Bu gün Prezident İlham Əliyevin rəhbərlik etdiyi Azərbaycan heç zaman olmadığı qədər güclü, qüdrətlidir və bugünkü müasir müstəqil, qalib Azərbaycan Ümummilli Lider Heydər Əliyevin görmək istədiyi Azərbaycandır”, - deyə S.Məmmədov vurğulayıb.
Tarixçi Alxan Məmmədov “Gürcüstan Azərbaycanlılarının tarixi” mövzusunda düşərgə iştirakçılarına mühazirə oxuyub. Mövzu ətrafında müzakirələr sual-cavab formatında baş tutub.
Düşərgənin ikinci günündə gənclər Dmanisi Tarix Muzeyinə səfər edərək rayonun yaranma tarixi ilə tanış olublar. Sonra rayon Milli parkında təşkilatçılar tərəfindən hazırlanmış əyləncəli proqramda iştirak ediblər.
Üçüncü günündə gənclər Borçalı aşıq məktəbinin nümayəndəsi aşıq Kamandar (Qurbanovla) görüşüblər. Aşıq Kamandar bildirib ki, Azərbaycan aşıq sənəti çox dərin tarixi kökləri olan və yüzilliklər boyu keçilən inkişaf yolunun məntiqi məhsuludur. Ən qədim dövrlərdən indiyədək saz-söz sənəti daşıyıcıları ozan, uzan, varsaq, dədə, qam, ata və bir-çox başqa adlarla tanınmışlar. Öz yaradıcılıq fəaliyyətində onlar tarixi hadisələri və gündəlik həyatı nəsil, tayfa və xalqın tarixi yaddaşına çevirməklə kifayətlənməyərək, müdrik məsləhətçi, el ağsaqqalı, əski inam biliciləri kimi çıxış etmişlər.
İştirakçılar Dmanisi Sionisi — Dmanisi şəhərində Patara Dmanisi kəndi yaxınlığında, üç kilsəli bazilika tipli VI əsr gürcü memarlığı abidəsinə səfər edib. Abidə 2006-cı il noyabrın 7-də Gürcüstan Prezidentinin fərmanı ilə ölkə əhəmiyyətli daşınmaz mədəniyyət abidəsi kateqoriyasına layiq görülüb. Burada gənclər qədim insanların məskunlaşdığı və arxeoloji qazıntılar zamanı tapılan məişət əşyaları ilə tanış olublar.
Proqrama uyğun olaraq vəkil Əli Bədirov “Gürcüstan qanunları və Konstitusiyası” mövzusunda mühazirə oxuyaraq ölkənin ali qanunvericiliyi haqqında düşərgə iştirakçılarına ətraflı məlumat verib.
Sonda Dmanisi yay düşərgəsində təlim və əyləncə proqramlarında fəal iştiraklarına görə gənclərə sertifikatlar təqdim edilib.
Xətayi Əzizov
Tbilisi
Bölmənin digər xəbərləri
