DÖVLƏT GÖMRÜK KOMİTƏSİ MƏTBUAT XİDMƏTİNİN MƏLUMATI
Fevralın 8-də Dövlət Gömrük Komitəsinin sədri, gömrük xidməti general-polkovniki Kəmaləddin Heydərov bp şirkətinin Azərbaycandakı baş təmsilçisi ABƏŞ-in prezidenti Deyvid Vudvordu qəbul etmişdir.
Dövlət Gömrük Komitəsinin sədri Kəmaləddin Heydərov hörmətli qonağı səmimiyyətlə salamlayaraq, Azərbaycan Respublikasının prezidenti möhtərəm Heydər Əliyevin uzaqgörən siyasəti nəticəsində 1994-cü ilin sentyabr ayında Bakıda dünyanın ən iri neft şirkətləri ilə imzalanmış “Əsrin müqaviləsi”nin Azərbaycanın ictimai-siyasi həyatında çox mühüm tarixi anlardan biri olduğunu diqqətə çatdırmışdır. Xəzər dənizindəki yataqlardan hasil edilən neftin çox mühüm coğrafi-strateji mövqeyə malik Azərbaycan Respublikası ərazisi vasitəsilə dünya bazarına çıxarılmasının respublikamız üçün həm iqtisadi, həm də strateji əhəmiyyət daşıdığını qeyd edən komitə sədri neft sektorunun inkişafında yaxından iştirak edən bp şirkətinin işini yüksək qiymətləndirmişdir. Bu çox mühüm iqtisadi və siyasi əhəmiyyətli məsələdə gömrük orqanlarının üzərinə düşən vəzifələrin daha operativ surətdə həyata keçirilməsini təmin etmək üçün bir sıra tədbirlər görüldüyünü vurğulayan Kəmaləddin Heydərov Neft Konsorsiumuna idxal olunan avadanlıq və əmlakın operativ surətdə rəsmiləşdirilməsi üçün “Sahil” gömrük postunun fəaliyyət göstərdiyini bildirmişdir.
Komitə sədri demişdir ki, Azərbaycan Respublikası prezidentinin “Azərbaycan Respublikası Dövlət Gömrük Komitəsinin strukturunun təsdiq edilməsi və Azərbaycan Respublikası Dövlət Gömrük Komitəsinin əsasnaməsinə əlavələr edilməsi haqqında”kı fərmanına əsasən Enerji gömrükxanasının fəaliyyətə başlaması üçün bütün hazırlıq işləri başa çatdırılıbdır. Bu qurum ölkənin gömrük sərhədindən nəqliyyat vasitələri, boru kəməri və elektrik ötürücü xətləri vasitəsilə keçən təbii qazın, xam neftin, məhsulların və elektrik enerjisinin, başqa sözlə, enerji daşıyıcılarının gömrük rəsmiləşdirilməsini təmin edəcəkdir.
Əlavə bir postun yaradılacağını, ayrıca bir qrupun bu işlə bağlı fəaliyyət göstərəcəyini qeyd edən komitə sədri bp şirkəti ilə qarşılıqlı əlaqədə fəaliyyət göstərməyin ümumi işin xeyrinə olacağını vurğulamışdır.
Səmimi qəbula görə təşəkkürünü bildirən cənab Deyvid Vudvord gömrük orqanlarının onillik yubileyi, eyni zamanda Azərbaycan prezidenti Heydər Əliyevin müvafiq Fərmanı ilə DGK sədrinə gömrük xidməti general-polkovniki rütbəsinin verilməsi münasibəti Kəmaləddin Heydərovu təbrik etmiş, əlaqələrin daha da genişlənəcəyinə ümid etdiyini bildirmişdir.
1994-cü ildən Azərbaycanda fəaliyyətə başladıqlarını xatırladan cənab Deyvid Vudvord “Əsrin müqaviləsi”ndən sonra ilkin neftin əldə olunması, bu layihənin uğurla həyata keçirilməsi yolunda çox mühüm işlər görüldüyünü söyləmişdir. İlkin mərhələ başa çatdıqdan sonra biz daha böyük və geniş miqyaslı layihələrə qədəm qoymaq fikrindəyik - deyə sözünə davam edən D.Vudvordun fikrincə, Azərbaycanda işlər o qədər genişlənəcək ki, bu, indiyə qədər görülmüş işlərlə müqayisədə 10-12 dəfə böyük olacaqdır.
“Azəri”, “Çıraq”, “Günəşli” yataqlarının tam miqyasda işlənməsinin birinci fazasından sonra həmin layihə çərçivəsində tikinti işlərinin yeni vüsət almaq mərhələsinə qədəm qoyduğunu söyləyən qonaq tezliklə Bakı-Tbilisi-Ceyhan neft kəmərinin, eyni zamanda “Şahdəniz” qaz kəmərinin tikintisinə başlayacaqlarını demişdir. Bu layihələrin həyata keçirilməsində DGK ilə çox yaxın əlaqələr yaratmağın çox vacib olduğunu söyləyən qonaq şirkətin həyata keçirdiyi layihələri komitə sədrinə təqdim etmişdir.
Görüşdə maraq doğuran digər məsələlər də müzakirə edilmişdir.
Bölmənin digər xəbərləri
